Duha ka drive-thru vaccination site ablihan sa Lapu-Lapu

CEBU, Philippines — Gikumpirmar ni Lapu-Lapu City Mayor Junard Ahong Chan nga mo-establisar sila og drive-thru vaccination site sa Liberty Shrine sa Barangay Mactan ug parking area sa Terminal 2 sa Mactan-Cebu International Airport (MCIA) sa  Dakbayan  sa Lapu-Lapu.

Giklaro niya nga dili nila itugot ang walk-in sa nahisgotan nga mga vaccination sites.

“Number one, we considered in Mactan Shrine. Makagawas man ka, tuyok. The other one mananghid ta sa airport didto sa Terminal 2 nga wala nila gamita,” ni Mayor Chan pa.

Subay niini miingon si Mayor Chan nga mo-hire sila og dugang doctors ug mga nurses nga ilang idestino sa maong mga vaccination sites.

Samtang sa laing bahin wala na kinahanglana pa sa mga public utility vehicle (PUV) drivers ug mga konduktor sa Dakbayan sa Lapu-Lapu ang pagsul-ob og personal air purifiers sa ilang pagpamasahero.

Gipadayag ni Mayor Ahong Chan nga makahatag lang kini og dugang kahasol sa mga drivers og konduktor.

Sukwahi kini sa giluwatan nga kamanduan ni Gobernador Gwendolyn Garcia nga pagpasul-ob sa driver ug konduktor og air purifier isip dugang proteksyon batok sa COVID-19.

Samtang gipahinumduman sa mayor ang mga driver ug konduktor nga padayon lang mosunod sa health ug safety protocols sama sa pagsul-ob og face mask, ug face shield ingon man ang kanunay nga pagtamod sa social distancing. —MEL (BANATNEWS)