Hoarding sa oxygen tanks gisusi sa NBI
CEBU, Philippines — Mohimo og imbestigasyon ang The National Bureau of Investigation in Central Visayas (NBI-7) kalabot sa giingong hoarding sa mga medical oxygen tanks sa Sugbo nunot sa pagsaka sa kaso coronavirus disease (Covid-19).
Matud ni Atty. Rennan Augustus Oliva ang director sa NBI - 7 nadawat na nila ang kamandoan gikan sa Department of Justice (DOJ) nga nitahas sa ilang buhatan mohimo og pakisusi sa maong hoarding sa oxygen tanks.
“I received an order from our director, Director Eric Distor, regarding the investigation of alleged hoarding of oxygen tanks and other medical supplies in our area,”matud ni Oliva.
Ang imbestigasyon lukop isla sa Sugbo, gikan sa Probinsya sa Sugbo ug sa tri-cities, Mandaue, Lapu-Lapu ug Mandaue.
Makigalayon usab ang NBI-7 sa mga concerned government agencies sa Central Visayas offices sama sa Department of Health (DOH), Department of Trade and Industry (DTI) ug Food and Drugs Administration (FDA). Sa mga nanggawas nga mga reports, daghan na ang mga tawong nangunay pagpalit og mga oxygen tanks aron gamiton sa ilang mga kabanay nga masakiton nga naglisod og ginhawa diha sa ilang balay.
Si Gobernador Gwendolyn Garcia niluwat na og kamandoan pag regulate sa pagbaligya sa medical oxygen tanks aron masiguro adunay igong supply niini.
Ang maong kamandoan paghimo og imbestigasyon gimando ug gipirmahan ni DOJ Secretary Menardo Guevarra.
Ang kamandoan ni Guevarra iyang giluwatan human nga si Cebu City Acting Mayor Michael Rama nanawagan sa Philippine National Police ug sa DOJ nga susihon kining matud pa hoarding sa oxygen tanks ug uban pang medical supplies dinhi sa Sugbu. Si PNP chief General Guillermo Eleazar misanong sab niini ug mimando sa Cebu City Police uban sa Regional Criminal Investigation and Detection Group paghimo og imbestigasyon.
Si Lieutenant Colonel Wilbert Parilla, Cebu City Police Office (CCPO) deputy director of operations miingon nga kadtong masakpang nagtago og supply sa oxygen tanks ug ubang medical supplies makasohan gyud. —IBM (BANATNEWS)
- Latest
