Daghan na ang nagtinguha nga mabakunahan

CEBU, Philippines — Gipahibawo ni Dr. Jeffrey Ibones, Officer-in-Charge sa Cebu City Health Department gikan sa Marso 24 hangtod sa August 3 moabot na sa 120,693 ang nabakunahan sa siyudad. Niabot na sab sa 452,489 ang nagparehistro aron magpabakuna kontra COVID-19.

Hangyo ni Dr. Ibones sa katawhan nga kadtong magpabakuna huwat lang gyud sa text message kay gitrabaho na sab nila ang ilang sistema human sa daghang nireklamo nga taod-taod na nagparehistro apan wala pa kadawat og text message.

Samtang sa Dakbayan sa Talisay gitug-an ni Dr. Lino Alanzado pangu sa City Health Office nga magabhian na sa pagpamakuna ang duha ka vaccination site sa siyudad. Kini gumikan sa kadaghan na sa mga tawo nga modagsa diin kaniadto naa lang sa usa ka libo ang ilang matagaan og bakuna apan karon moabot na sa dos mil ka tawo ang mabakunahan.

Sa Lawaan 1 nga vaccination site imbis 300 lang ang ilang bakunahan niabot kini sa 1, 300.

Si Mayor Gerald Anthony “Samsam” Gullas nihangyo sa Visayas Vaccination Center nga doblehon ang paghatag og bakuna gani sa sunod semana posibleng aduna nasab silay ikaupat nga vaccination site nga buksan. Ila nasab unya dungagan ang mga midwife ug Barangay Health Worker (BHW) nga ipaubos sa training aron makatabang sa pagpamakuna.

Ang Talisay nakabakuna na og 46 mil kapin ug kulang ka mga Talisaynon.

Malaumon usab si Mayor Junard Ahong Chan sa Dakbayan sa Lapu-Lapu nga mabakunahan ang 70 porsiyento sa mga Oponganon aron pagkab-ot og “herd immunity”. Gumikan niini gidugangan usab ni Chan ang mga vaccination site sa siyudad sa tinguha nga makab-ot ang maong target. —Gabriel C. Bonjoc/Romeo T.  Limpangog/MEL (BANATNEWS)