Konsehal Garcia giindorso nga mokandidato pagka bise mayor

CEBU, Philippines — Gibutyag ni Konsehal Junjun Osmeña nga kasagaran sa mga sakop sa Kugi Uswag Sugbo (KUSUG) ug Partido Panaghiusa ni-endorso kang Konsehal Raymond Garcia nga maoy ilang padaganon isip bise mayor sa Siyudad sa Sugbo sa umaabot nga piniliay karong 2022.

Hinoon gitataw ni Osmena nga wala pa’y final nga desisyon ang grupo ug ila ra kining ipahibawo sa umaabot nga mga adlaw.

Nasayran nga sa higayon nga dunay tambongan nga mga kalihokan si Garcia, kanunay siya nga ihulagway sa iyang mga kauban isip umaabot bise mayor.

Samtang gikumpirmar ni Konsehal Osmeña nga hingpit na ang kowalisyon sa KUSUG ug Partido Panaghiusa.

Nagdumili pa pagbutyag ang konsehal kun kinsa ang padaganon pagka-mayor sa ilang grupo sanglit nagpadayon pa ang mga tigom.

Una na nga gidungog nga si Acting Mayor Michael Rama maoy ilang kandidato pagka-mayor.

Si Rama maoy founder sa Partido Barug ug base sa iyang pamahayag kaniadto, magpabilin ang koalisyon sa iyang grupo ngadto sa KUSUG ug Panaghiusa.

Samtang si Konsehal Garcia sa iyang bahin, dili pa siya makasulti sa sunod niya nga daganan, apan bukas siya sa posibilidad nga magpapili sa mas taas nga posisyon.

Si Garcia maoy usa sa mga dakong opisyal sa KUSUG ug giingong nihimo na kini og konsultasyon ngadto sa ilang mga lider sa kabaranggayan. MEL (BANATNEWS)