Ordinansahon pagtukod og road safety academy giduso

Cebu, Philippines — Si Cebu City Councilor James Anthony Cuenco miduso og ordinansahon nga mag-establisar og Road Safety Academy ubos sa Department of Manpower Development and Placement (DMDP) pinaagi sab sa pakig-alayon sa Land Transportation Office (LTO)-7.

Ang maong ordinansahon nag-ulohan og “Road Safety Academy Ordinance of Cebu City” gi-refer sa Committee on Laws, Ordinances, and Styling ingon man sa Committee on Budget and Finance alang sa pagtuon.

Segun sa maong sugyot , dunay panginahanglan sa pagtukod og driving school alang sa mga constituents sa Sugbo ilabi na kadtong dili maka-afford sa pag-enroll sa mga accredited driving school sa LTO..

Umulon kini uban sa DMDP Road Safety Academy nga accredited isip driving school subay na sa provisions sa LTO MC No. 2019-2176.

Subject sa Civil Service Rules and Regulations, ang Local Chief Executive o ang DMDP head/officer-in-charge gitugutan nga makaumol og positions sa mga personnel ug instructors nga accredited sa LTO aron motudlo og complete courses sa mga student drivers.

Nalatid sa section 8 sa ordinansa nga dunay gamay nga bayranan nga kolektahon gikan sa mga estudyante sa academy, hinuon libre kini alang sa mga indigents nga way ikasarang sa pagbayad ug mohatag lang kini og barangay certificate diin sila nagpuyo.

Ang academy mohipos og mga importanteng data ug records sa study programs apil na ang ubang school records sa mga tinun-an.

Mokabat sa P100 million ang pundo nga itagana niini sa higayon nga maaprobahan nga mo-cover sa initial fund requirements alang sa supplies ug personnel services ubos sa plantilla positions sa giumol nga management ug operation sa Cebu Road Safety Academy. (BANAT NEWS)