Supervised lockdown

CEBU, Philippines — Giawhag ni Cebu City acting mayor Michael Rama ang mga ginikanan nga mopatuman og parental supervised lockdown o household lockdown sa ilang tagsa-tagsa ka panimalay aron protektahan ang ilang banay gikan sa coronavirus ilabi  na karon nga naa na dinhi sa siyudad ang Delta variant niini.

Awhag kini ni Rama sa mga ginikanan sanglit sila maoy dunay gahom ug moral nga tahas pagsanta sa mga miyembro sa ilang pamilya nga mga badlungon aron dili makahatag og problema.

Gituyo kini aron dili mogawas sa balay ang ilang mga anak o miyembro sa pamilya kun dili importante ang tuyo sa gawas aron dili matakboyan ug madugang na hinuon sa mamahimong hinungdan nga ma-lockdown ang tibuok siyudad.

“As I highlighted let’s all avoid the so called lockdown because we might end up knockdown but rather substitute it and then probably I will have an Executive Order if it is needed but which I call it parental supervised household lockdown where simplify it let it now be the parents to be part of implementing what ought to be,” dugang ni Rama. Sa mga suok nga mga bahin mga barangay, daghang mga tawong wala na motuman pa sa pagsuot og facemask ug wala na sab mag-social distancing apan walay nakapakgang kanila tungod kay wala may mosumbong sa barangay.

Gumikan sa nagkataas nga kaso sa COVID-19 sa Cebu City ug niining report nga duna nay 32 ka mga kaso sa Delta variant dinhi sa Sugbo nga diin unom ang nia sa siyudad giawhag sa kagamhanan ang katawhan nga magmatngon ug sundon ang mga health protocols aron mamenusan ang tsansang modaghan ang matakdan niini.

Nanagana

Ang Cebu City nanagana nga kung magsugod ang lokal nga tinakdanay sa maong variant manginahanglan gyud og daghang lawak ug pasilidad.

Ang Delta variant maoy labing bangis ug labing paspas kun makatakod sa tanang matang sa coronavirus.

Giandam karon ang unang tulo ka andana sa Cebu City Medical Center(CCMC), pag-andam sab sa Cebu City Sports Center apil na ang International Eucharistic Congress isip isolation facility kun pananglitan mosaka gyud ang kaso; paspasan ang pag -hire og medical personnel sama sa mga nurses.

“Number 1 if you remember we’ve been talking already that we must presume that the Delta is around therefore we must be five step advance and the five steps advance kabalo mo meeting here, meeting there, preparing the sports complex, expanding the CCQC, number 3, I have been very clear including CCMC three floors to be ready for occupancy in one week time and that has been very clearly as my directive and then of course all parts should be close,” matud ni Rama.

Mga kaso

Sa datos nga gipagawas sa Department of Health Central Visayas ang Dakbayan sa Sugbo nakatala og dugang 286 ka bag-ong kaso hinungdan nga miabot sa 29,428 ang total cases sa siyudad ug naa sa 2,527 ang active cases. Duna hinuoy 114 nga dugang nangaayo samtang nagpabiling 911 ang nangamatay.

Samtang ang Mandaue City adunay 8,027 total cases sa COVID-19 human nakatala og 96 ka bag-ong kaso ug naa sa 888 ang ilang aktibong kaso ug dunay usa nga dugang nakalas.

Ang Lapu-Lapu City adunay 8,430 total cases tungod sa 159 ka bag-ong kaso ug gani 1,239 ang ilang active cases ug naa sa 183 ang nakalas.

Sa datos sa DOH-7 ang Central Visayas dunay 86,240 total cases sa COVID-19; 9,819 ang active cases; 73,939 ang recoveries ug 2,482 ang deaths. —IBM (BANATNEWS)