Pagpamakuna ipadayon bisan mag-MECQ—Rama

CEBU, Philippines — Gianunsiyo ni Cebu City Acting Mayor Michael Rama nga magpadayon ang pagpamakuna bisan og mapaubos sa modified enhanced community quarantine (MECQ) ang Siyudad sa Sugbo.

Matud ni Rama nga dili kini pwede nga mahunong ilabi na karon nga ubay-ubay na ang nadasig nga magpabakuna.

Samtang si Konsehal Dave Tumulak nagkanayon nga kon madayon ang girekomendar sa National Inter-Agency Task Force nga ipaubos sa MECQ ang Dakbayan sa Sugbo ipagamit dayon ang mga sakyanan o bus sa siyudad ug barangay aron iserbisyo sa mga magpabakuna.

Subling gipanawagan sa kagamhanan sa siyudad nga dili mag-walk-in aron malikayan ang mga kasamok ug mamentinar ang social distancing.

Sa laing bahin, giawhag sa Cebu City Council ang business establishments nga nag-operate sa siyudad nga nagtanyag og mga diskwento, freebies ug ubang promo alang sa mga tawo nga nakapabakuna na nga iduso ang pangalan sa ilang establisamento ngadto sa kagamhanan sa Siyudad sa Sugbo.

Tumong niini nga matabangan sila sa kagamhanan nga i-promote ang ilang mga negosyo diin pagpakita usab kini sa ilang paghangop sa mga establisamento nga nihatag og bili sa kampaniya sa pagpamakuna.

Nunot niini, gikatahong daghan sa mga senior citizen kinsa sayo nga nilinya diha sa NOAH Complex sa South Road Property kinsa gustong magpabakuna ang nagyawyaw ug nasagmuyo tungod kay nabalibaran gumikan kay gamay ra ang supply sa bakuna. Nasayran nga diha sa NOAH Complex gipahigayon ang vaccination sa senior citizens sa Siyudad sa Sugbo gamit ang Johnson and Johnson vaccines.

Si Neil Odchige, property manager sa NOAH Complex nagkanayon nga 500 doses lang ka Johnson and Johnson vaccines ang anaa kagahapon apan sobra sa 500 ka senior citizens ang niadto sa maong vaccination site diin uban niini ang wala marehistro.

Si Rama niapelar sa national government nga hatagan og dugang mga bakuna ang siyudad.

Samtang sa Dakbayan sa Mandaue sobra sa 4,000 ka tawo ang nabakunahan na nga nidagsa niadtong Hulyo 29, 2021 sa mga vaccination center sa siyudad.

Si Subangdaku Barangay Captain Ernie Manatad, city's vaccine board chairman nibutyag nga niadtong nangagi nga mga adlaw anaa lang sa 1,000 ngadto sa 2,000 ka tawo ang magpabakuna.

Sukad sa niaging Huwebes ang lokal nga kagamhanan sa dakbayan nakabakuna na og 95, 497 ka tawo. —Decemay P. Padilla, Rowena D. Capistrano,  Romeo T. Limpangog/BDB (BANATNEWS)