CEBU, Philippines — Naaprobahan na sa konseho sa Siyudad sa Sugbo ang dul-an sa P4.5 billion nga Supplemental Budget No. 1 (SB1) nga giduso ni Cebu City Mayor Edgardo Labella diin nalakip niini ang nalangan nga mga sweldo sa pipila ka medical workers sa siyudad. Nasayran nga niabot og kapin sa pito ka oras ang session sa konseho niadtong Miyerkules sa pagtuki sa maong supplemental budget.
Pipila sa mga dagko nga alokasyon nga nalakip sa SB1 mao ang bayranan sa loan alang sa South Road Properties nga P1.2 bilyon; pagpatiwas sa construction sa Cebu City Medical Center, P1 bilyon; dugang pundo sa financial assistance sa senior citizens, P200 milyones; assistance sa mga barangay, P268 milyones; dugang pundo sa City Hospitalization Assistance and Medicines Program, P140 milyones; Special Program for Employment of Students, P10 milyones ug uban pa.
Atol sa botasyon sa mga sakop sa konseho 8-6 ang resulta diin pabor sa majority bloc. Atol sa session, gitataw sa minority floor leader Konsehal Nestor Archival nga kinahanglang ipaubos sa lapad nga pakisusi ang pipila ka items sa SB1.
Samtang ang laing sakop sa oposisyon Konsehal Franklyn Ong, presidente sa Liga ng mga Barangays (LNB) nitataw nga hatagan unta og igong oras ang pagtuki sa SB1 .
Samtang si Konsehal Raymond Garcia kinsa sakop sa majority block nagkanayon nga makaduha na kahigayon nga gisusi sa committee on budget and finance ang SB1 gani adunay mga higayon nga gipaubos kini og adjustments. —BDB (BANATNEWS)