CEBU, Philippines — Human sa Fort San Pedro , giistrikto na usab sa Kagamhanan sa Siyudad sa Sugbo ang Plaza Independencia, Plaza Sugbo, ug ang Fuente Osmeña Circle nga dili patapokan sa bisan unsa nga gathering.
Mao kini ang gibutyag ni Cebu City Acting Mayor Michael Rama kinsa nitataw nga likayan na gyud ang mga tapok-tapok ilabi na karon nga nisaka og samot ang kaso sa COVID19 dinhi sa siyudad.
“All the areas, the Fort San Pedro, Plaza Independencia, Fuente, there should be no convergence there,” suma pa ni Rama.
Suma pa sa acting mayor nga dunay kapolisan ug mga personnel sa kagamhanan ang mag-roving kanunay sa maong public parks aron masita ang magtapok-tapok.
Kahinumdoman nag-trending ang Plaza Independencia, human nikatap ang hulagway sa daghang mga tawo nga nanuroy.
Giawhag ni Rama ang publiko nga labing maayo nga magpuyo nalang gyud sa balay kun walay importanteng buhaton sa gawas. —MEL (BANATNEWS)