Casas: Kondisyon sa panglawas ni Labella aduna nay kalamboan
CEBU, Philippines — Gibutyag ni Cebu City Administrator Floro Casas Jr. nga aduna nay dako nga kalamboan sa kasamtangang kondisyon sa panglawas ni Mayor Edgardo Labella.
Ug posibleng makatrabaho na kini sa sunod semana apan giklaro ni Casas nga gaagad ra gyud sila sa final nga tambag sa doktor.
“Mag-agad ra gyud mi sa isulti sa doktor, mao nga dili pa namo masulti kon kanos-a makabalik sa trabaho si mayor”, ni Casas pa.
Giingong kasamtangangang nagpaalim si Labella sa usa ka pribadong tambalanan tungod sa sakit nga pneumonia.
Matud ni Casas nga posibleng mopaubos sa “work from home” si Labella kon makatrabaho na kini og balik.
Ang kaso sa COVID-19 sa siyudad nagkataas kini hinungdan nga dili angayang mogawas si Labella ilabi na usab nga usa na kini ka senior citizen.
Gibutyag ni Casas nga dili mahimutang si Labella kon dili kini makatrabaho apan ang tanan nag-agad ra gyud sa tambag sa doktor.
Samtang si Acting Mayor Michael Rama nibutyag nga taod-taod na niya nga wala mahinabi si Labella.
Giklaro usab ni Rama nga wala siya’y katungod sa paghatag og update sa health status sa mayor.
Matud ni Rama nga kadaghan na siya nitawag sa mga tawo sa mayor apan dili gyud kini makontak.
Sayo pa, si Casas nihangyo kini sa publiko nga dili magpadala sa nikatap nga fake news kalabot sa estado sa mayor ilabi na sa mga tunglo sa kinabuhi niini. —BDB (BANATNEWS)
- Latest