20 porsyento sa populasyon sa siyudad ang nabakunahan

CEBU, Philippines — Gipahibawo ni Dr. Jeffrey Ibones, Officer-in-Charge sa Cebu City Health Department nga moabot na sa 20 percent sa total target nga 70 percent ang nabakunahan sa Siyudad sa Sugbo.

Apan suma pa niini nga ang maong porsyento layo pa kaayo sa ilang target nga 70 percent sa total population sa Siyudad sa Sugbo.

Base sa datos sa Cebu City gikan sa Marso 24, 2021 hangtud niadtong Martes, Hulyo 27 niabot na sa 116,000 ang nakadawat sa ilang first dose sa COVID-19 vaccine ug naa sa 53,393 ang fully vaccinated.

Sa pagkakaron ang Cebu City dunay napulo ka vaccination sites nga operational kini nalangkob sa Robinson’s Galleria, SM Seaside City Cebu, Ayala Center Cebu, University of Cebu sa J. Alcantar Street Barangay Sambag 1 ug Banilad Campus ug diha sa NOAH Complex sa South Road Properties.

Ang laing upat ka vaccination sites sa Siyudad naa nahimutang sa mga bukirang barangay sa siyudad nga maoy mo-akomodar sa mga        residente sa mountain barangays.

Nasayran sab nga niabot na sa 370,000 ang kinatibuk-an nga nagparehistro nga magpabakuha sa Cebu City.

Samtang nihangyo si Cebu City Acting Mayor Michael Rama sa katawhan nga dili lang gyud mag-walk- in sa mga vaccination site aron malikayan ang pagdumog sa mga tawo.

Matud pa ni Rama nga dili siya gusto nga mabutang sa risgo ang katawhan ug labing maayo nga motuman lang sa skedyul aron maseguro ang kahapsay sa mga vaccination site.

Gipasalig usab ni Rama nga hatagan og kasulbaran ang mga reklamo sa katawhan nga dugay na nga nagpa-register online apan wala pa kadawat og skedyul sa ilang pagpabakuna.

Sa laing bahin giklaro sa tigpamaba sa Project Balik Buhay, Dr. Mary Jean Loreche, nga way kamatuoran ang gikahadlokan sa katawhan nga mahimong zombie sulod sa pipila ka tuig kung sila magpabakuna.

Dugang pa ni Loreche, nga ang bakuna gihatag kini aron batukan ang COVID-19 ug luwas kini nga ihatag sa katawhan ug siya nagtuo nga kuwang sa saktong impormasyon ang mga tawo nga motuo niini. —Sanden J. Anadia/ Rowena D. Capistrano (BANATNEWS)