18 ka tinun-an makapahimulos sa scholarship program
CEBU, Philippines — Miabot sa 18 ka mga tinun-an ang kwalipikado sa programa nga Cream of the Crop Scholarship ni mayor Gerald Anthony “Samsam” Gullas.
Sila maoy ikaduhang batch sa programa human kini nasugdan niadtong tuig 2019.
Ang mga tinun-ang kabus nga motungtong na sa kolehiyo ang natagaan og higayon nga makapamili og kurso nga naa lang sa mga tunghaan sa Syudad sa Sugbo.
Si Gullas nagkanayon nga sayang ang nakamahuan sa tinun-an kung dili niya mapadayon ang kurso nga iyang gipangandoy busa iya kining gihimo nga programa sa pagsuporta sa mga tinun-an.
Ang ikaduhang batch nga eskolar nidawat na sa ilang P20 mil pesos nga salapi aron ibayad nga tuition fee matag semester sa tunghaan nga ilang mapilian.
Apan sa iyang programa wala gilakip ni Mayor Gullas ang University of the Visayas (UV) sa pilianan nga tunghaan aron mawagtang ang pagduda.
Gawas sa Cream of the Crop Program naa sab ang Talisay City College nga naghatag og libreng tuition fee alang sa mga Talisaynon.
“It pains me to see potential wasted away due to various limitations, but through this scholarship program, hopefully we can change that,” nagkanayon ang mayor.
Ang unang batch nga nakapahimulos sa programa niabot sila og 15 ka tinun-an ug padayon sila nga mahimong escolar basta lang mamentinar nila ang ilang grado.
Dugang pa ni Gullas nga unta gamiton sa kabataan ang ilang nakat-onan alang sa kaayohan sa ilang kaugalingon ug pamilya lakip nasab sa siyudad. —MEL (BANATNEWS)
- Latest