CEBU, Philippines — Nasikop ang usa ka cultivator og marijuana atol sa gipahigayong operasyon sa Philippine Drug Enforcement Agency-7, Cebu Police Provincial Office (CPPO) Provincial Intelligence Unit (PIU) Provincial Drug Enforcement Unit (PDEU), Asturias Police Station ug Regional Intelligence Unit- 7 kagahapon sa buntag diha sa Purok 1, Barangay Kaluangan, Lungsod sa Austurias.
Ang suspetsado mao si Edwin Camaongay, 47-anyos, mag-uuma, taga Barangay Langosig, Dakbayan sa Danao.
Niabot ngadto sa 10,150 ka punoan sa marijuana ang nalarot nga gibana-banang nikantidad tanan ngadto sa P4,060,000 diin gitanom kini diha sa 1,000 square meters nga luna.
Ang maong mga marijuana gisunog ngadto sa lugar ug nagdala lang ang kapolisan og pipila niini aron himuong tipik sa ebidensiya.
Ang suspetsado kinsa natingkagol sa detention cell sa Asturias Police Station gikatakdang pasakaan og kasong kalapasan sa Section 16, Article II sa Akta Republika 9165 kun “Comprehensive Dangerous Drugs Act of 2002”.
Matud pa ni Leia Albiar-Alcantara, tigpamaba sa PDEA-7 nga nakadawat sila og report nga si Camaongay adunay pag-umangkon nga nakasibat atol sa operasyon batok sa pagpananom og marijuana niadtong buwan sa Pebrero 2021diha gihapon sa nahisgutang barangay.
Niadtong buwan sa Abril 2021, ang anak na usab niini ang subject apan negatibo ang operasyon tungod kay walay mga tanom ug gituohan nga bag-o kining naka-harvest ug nakasibat ang subject. BDB (BANATNEWS)