Cebu City magbutang og mental health helplines

CEBU, Philippines — Gihangop sa religious sector ang ang programa sa kagamhanan sa Dakbayan sa Sugbo nga magbutang og 24/7 nga mental health helplines.

Matud ni Iell Puza, committee head sa Youth Frontier sa Commission on Youth sa Archdiocese of Cebu nga dako kaayo og matabang ang maong programa.

Nasayran nga hingpit na nga nakapasar sa konseho sa Siyudad sa Sugbo ang resolusyon nga nag-awhag sa Cebu City Health Department (CHD) ug Cebu City Medical Center (CCMC) nga mag-establisar sa ilang pasilidad og 24/7 nga mental health helplines aron motabang og atiman sa mga tawo nga naghambin og suliran kalabot sa emosyonal ug mental nga aspeto nga nahatag sa pandemiya.

Giawhag usab sa konseho ang CHD ug CCMC  nga pahibaw-on ang mga barangay pinaagi sa  Association of Barangay Councils (ABC) kalabot sa helplines aron masayod ang mga tawo sa maong programa.

Niining ulahi lang, ang resolusyon nga gipangamahanan ni Konsehal Alvin Dizon kabahin sa maong programa ang giaprobahan sa konseho sa siyudad.

Kinahanglan nga 24/7 ang maong mental helplines aron daghan ang matabangan sa bisan unsang orasa.

Base sa talaan sa Philippine Statistics Authority (PSA) adunay 57 porsyento nga pagsaka sa suicide rate sa nasud niadtong tuig 2020  human nitumaw ang pandemiya.

Giingong tungod sa gisagubang nga mga suliran ang uban niini mosangpot sa depresyon ug angayan kini nga hatagan og ka estorya aron maulian sa ilang gihambin.

Nasayran usab nga ang National Center for Mental Health (NCMH) nakatala og daghang tawag sukad nagsugod ang pandemiya sa niaging tuig.

Ang ilang buhatan makadawat og 700 ka tawag matag buwan gikan sa naandan nga 400. BDB (BANATNEWS)