_banat
^

Banat Balita

Komentarista gipatay

Rowena D. Capistrano - Banat

CEBU, Philippines — Patay ang 45-anyos nga  komentaristang blocktimer sa DYRB Radio Station human kini gipusil sa wala mailhing tawo samtang padulong kini mosakay sa iyang sakyanan ubos nga bahin sa ilang sibyaanan diha sa may N. Bacalso Avenue, Barangay Mambaling ning Dakbayan sa Sugbo, mga alas-9:10 kagahapon sa buntag.

Ang nakalas mao si Reynante “Rey” Cortes, taga Sitio Lutao-Lutao, Barangay Tisa sa Dakbayan sa Sugbu. Siya maoy anchor/commentator sa programang Engkwentro matag alas-7:30 hangtud alas 8:30 sa buntag.

Matud pa ni Konsehal Dave Tumulak, samtang nagprograma siya sa maong sibyaanan gipahibalo siya nga gipusil si Cortes hinungdan nga iyaha kining gikanaug sa ubos.

Iyang nakita si Cortes nga nagginhawa pa maong dali niya kining gipahatod sa iyang drayber ngadto sa Cebu City Medical Center.

Si Tumulak nagtuo nga pasakay na sa iyang sakyanan ang biktima sa dihang giduol ug gipusil sa wala mailhing mamumuno. Nakadagan pa kini sa passenger seat apan wala na makasulod kay nahagba na     kini.

Matud pang Tumulak dunay samad pinusilan sa dughan ug bukton si Cortes. Si Tumulak, niawhag sa kapulisan nga palawman ang imbestigasyon sa pagpatay kang Cortes.

Si Police Major Dindo Alaras, hepe sa Mambaling Police Station miingon nga gilusad dayon nila ang Oplan Universe aron mababagan ang mga dalan nga posibleng lutsan sa mga mamumuno apan wala silay na-iintercept.

Gisusi nila karon kun dunay cctv camera  nga nakakuha og footage sa hitabo nga makatabang sa imbestigasyon.

Gibutyag ni Alaras ang kauban ni Cortes miingon nga nakadungog sila og buto apan wala silay nakita nga tawo kay diretso ra nga nahagba ang biktima.

Ilaha karong gisubay ang mga unod sa mga programa ni Cortes nga posibleng makatabang unya sa ilang imbestigasyon.

Magpaabot pa usab si Alaras, sa resulta sa autopsy aron ilang masayran kung asa gikan ang pagpusil nga nakaigo niya sa dughan ug bukton, lakip usab sa armas nga gigamit niini.

Duha ka angulo ang gitutukan karon sa kapulisan, trabaho niini ug personal nga bangi sa komentarista ug sa ubang tawo.

Gipadayag ni Alaras patay nang naabot sa tambalanan sa Cebu City Medical Center si Cortes.

Task force

Si Police Lieutenant Colonel Wilbert Parilla, deputy director for operations sa Cebu City Police mibutyag nga mimando na si City Police Director Police Colonel Josefino Ligan pagmugna og Special Investigation Task Group ilabi na nga media personality ang gipatay.

Ang SITG, group langkoban sa Mambaling Police Station, CIDG, SOCO ug uban investigating unit.

Si Parilla, nitug-an nga si Cortes, maoy ika-14 nga gipatay karon lang buwan sa Hulyo kini bisan paman og aduna na silay mga estratehiya nga gihimo batok kriminalidad.

Ang pamilya ni Cortes, wala pa mohatag og pamahayag ilabi na ang asawa niini nga nagsaulog pa gayud unta sa iyang adlaw nga natawhan.

Si Mayor Junard “Ahong” Chan, sa Dakbayan sa Lapulapu, nakurat sa pagkadawat sa balita ug mipadangat dayon sa iyang pahasubo kay suod sila nga higala sa maong komentarista.

Nipasalig ang mayor nga andam siyang mounong sa pamilya ni Cortes ning panahon sa ilang kasub-anan.

Ang Cebu Citizens Press Council mipagawas og pamahayag ug nanawagan sa kapolisan paghimo og Special Investigation Task Force aron daling masulbad ang maong kaso.

“Whether he was a regular staff member or block-timer of dyRB

does not change this fact: He was a media practitioner whose killers should be arrested and prosecuted,” sumala pa sa pamahayag.

“The Cortes murder appears to be work-related but even if it were not,  it was still a disruption of Cebu’s peace and order, a desecration of community values should it  go unpunished,” dugang pa sa CCPC.

Sa pikas bahin, ang National Union of Journalists of the Philippines-Cebu chapter (NUJP Cebu) nikondenar sa linoog nga pagpatay kang Cortes.

“NUJP-Cebu condemns the killing of Cortes and fervently demands justice for his death. We call for a swift and impartial investigation into the incident. Attacks against journalists and media workers continue to rise and are being normalized simply for fulfilling our duties as watchdogs of society,” matud pa sa ilang pamahayag.

Babaye gipatay sab

Laing pagpamusil sab ang nahitabo kagahapon sa buntag diin usa ka 30-anyos nga ginang ang gipusil patay sa wala mailhing mamumuno diha sa Mahayahay 2, Barangay Calamba ning Dakbayan sa Sugbo.

Ang nakalas naila nga si Minchie Taborada, residente sa maong lugar. Samtang ang mamumuno, wala kini mailhi.

Matud pa ni Police Lieutenant Colonel Wilbert Parilla, deputy director for operations sa Cebu City Police nga ilang nabantayan karon nga kasagaran sa mga nabiktima sa pagpamusil nga babaye mga giingong mga nalambigit sa illegal nga drugas.

Sumala pa ni Parilla, base sa kasayuran nga nakuha sa ilang imbestigador si Taborada giingong namaligya og ilegal nga drugas.

Si Parilla, nitug-an si Taborada, maoy ika-15 nga biktima sa pagpamusil gikan sa Hulyo 1 ngadto sa Hulyo 22, 2021.

Blangko pa karon ang kapulisan sa motibo sa pagpamusil ug ipaubos pa kini karon sa linawom nga imbestigasyon.

Police visibility

Tungod sa sagunson nga mga insidente sa pagpamusil nga nahitabo sa Cebu City, gimandoan ni Cebu City Acting Mayor Michael Rama ang Cebu City Police Office nga pangusgan pa ang police visibility sa dakbayan.

Gimandoan usab ni Rama ang kapolisan nga sulbaron kining maong mga pagpamatay sa labing daling panahon tungod kay nakahatag kini og kahadlok sa publiko ug magduda na kun luwas pa bang puy-an ang dakbayan.

Si Rama miawhag ni Konsehal Phillip Zafra kinsa chairman sa committee on peace and order sa konseho nga tutokan kining maong mga panghitabo. —Sanden Anadia/IBM (BANATNEWS)

DEAD
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with