Samboan gipaubos sa hard lockdown
CEBU, Philippines — Sugod karong adlawa ipaubos sa "hard lockdown" ang Lungsod sa Samboan diin molungtad kini sulod sa unom ka adlaw o hangtud sa Hulyo 28, 2021.
Kini gumikan sa nagsaka nga kaso sa COVID-19 sa lungsod hinungdan nga nihimo og lakang ang local government unit aron malikayan ang pagkatap sa virus.
Base sa executive order nga giluwat ni Samboan Mayor Emerito Calderon Jr. nimando kini nga kinahanglang ipatuman ang "stay at home order" ug restriction sa biyahe.
Ang tanang matang sa transportasyon pribado o pampubliko apil na ang "unauthorized movement" sa mga tawo ang dili mamahimo gawas lang kadtong nanginahanglan og medical nga atensiyon o kadtong dad-on sa hospital.
Walay itugot nga mass gathering, tanang business establishment ug tourist destination sirado gawas sa mga pharmacy, money transfer ug convenience store.
Ang mga sari-sari store, gas station ug banko mamahimong mo bukas sa ika-upat nga adlaw gikan sa unang adlaw sa lockdown.
Ang mga merkado sa lungsod sirado, tourist spot, restaurants o karenderiya.
Ang lungsod moapod-apod kini og pagkaon ug tamabal sa mga apektado nga residente atol sa lockdown..
Hinuon adunay gipili nga authorized personnel nga gitugotang makasulod sa mga apektado nga lugar.
Sa laing bahin, walay transaksiyon nga ipahigayon ang Barangay Lawaan 1, Dakbayan sa Talisay karong semanaha.
Kini human sila gi-lockdown tungod kay nagkapositibo sa COVID-19 ang ilang kapitan nga si Joel Cabo.
Si Cabo nahibaw-an nga nagpositibo sa COVID-19 human sa ilang sesyon sa barangay hinungdan nga tibuok opisina ang ilang gi-lockdown.
Ang opisyales ug mga kawani ang gipaubos sa quarantine. —Gabriel C. Bonjoc/BDB (BANATNEWS)
- Latest