Labella mo-extend pa sa iyang leave
CEBU, Philippines — Gibutyag ni Cebu City Acting Mayor Michael Rama nga posibleng ma-extend ang temporaryong paghupot niya sa trabaho ni Mayor Edgardo Labella.
Karon na untang Hulyo 25, 2021 kutob ang iyang pagka-acting mayor apan malugwayan kini alang sa padayon nga pagpaalim ni Labella sa gipamati sa lawas niini.
Matud ni Rama nga ang kataposan niya nga komunikasyon sa mayor kay niadto pang buwan sa Hunyo niining tuiga.
Samtang si Cebu City Administrator Floro Casas, Jr. nibutyag nga ganahan ang pamilya ni Labella nga 100 porsyento na kining naayo kon mobalik kini sa trabaho ug posible gyud nga ma-extend ang medical leave sa mayor.
Matud ni Casas nga anaa pa karon sa hospital si Labella tungod kay mao kini ang tambag sa iyang doktor apan “improving” na ang kondisyon niini.
Nasayran nga ikalima na ka higayon naka-file og leave si Labella sukad niadtong buwan sa Enero karong tuiga.
Gipahimangnoan usab si Labella nga dili magpalabi og expose sa daghang tawo. —BDB (BANATNEWS)
- Latest