Senior citizens sa Consolacion gidasig nga magpabakuna

CEBU, Philippines — Giawhag sa kagamhanan sa Lungsod sa Consolacion ang mga senior citizens sa pagpahimulos sa one dose vaccine karong adlawa Hulyo 23, 2021.

Kadtong mga seniors nga nakaparehistro na unya wala pa matawagi mahimo gihapon nga magpabakuna sa first dose ug modawat ra usab sila og walk-in.

Si Mayor Joannes Joyjoy Pepito Alegado nga usa ka doktor sa panglawas ang padayon nga nag-awhag sa katawhan nga magpabakuna gayud.

Gipadayag sa mayor nga ang Delta Variant mas papas nga makatakod ug mas grabe ang sintomas nga masinati sa matakboyan ug mas bata ang pangidaron ang posible nga magrabehan sa maong sakit.

"So karon, with that new variant, angayan gyud ta nga magmatngon. Pinaka importante gyud nato is nga magpa-vaccinate gyud. Mao gyud ang first and foremost nga campaign nga akong gitawag karon kay based pod ni sa atong nakita nga news ngadto sa gawas nga kasagaran nga nabiktima gyud mao ang unvaccinated, segun ni Mayor Alegado.

Sa laing bahin nakabaton na og Mobile Vaccine Clinic ang kagamhanan sa Dakbayan sa Mandaue.                                   Si Atty Maria Verfa De Jesus PRC-Cebu Chapter administrator miingon nga ang proyekto natigayon pinaagi sa ilang partnership sa kagamhanan sa dakbayan, ingon man sa Uber Express nga maoy labing unang natigayon dinhi sa Sugbo.

Ang nahisgotan nga Mobile Vaccine Clinic maoy nadugang sa lima ka mga vaccination site sa dakbayan nga naglakip sa Mandaue City Cultural and Sports Complex, UCLM campus new building, Pacific Mall, J. Center Mall ug Parkmall. —MEL (BANATNEWS)