Taas nga singil sa kuryente sa Hulyo-Agosto

Cebu, Philippines — Mipasidaan ang Visayan Electric sa mga konsumidor sa posibleng pagsaka sa singil sa ilang bills karong Hulyo hangtud Agosto tungod sa taas nga generation rates.

Ang pagsaka sa singil sa kuryente nagagumikan sa pagsaka sa presyo sa lana ug cola sa world market.

Matud pa mosaka og P0.39/kWh  ang singil karong bulan sa Hulyo ug Agosto nga billing period.

“We are asking our customers to be mindful of their electricity use because of the high prices of coal, fuel and even WESM. While we understand that electricity is a necessity especially since many are working from home, we are reminding our customers to use electricity wisely to avoid bill shock,”pagpasabot pa ni Visayan Electric President and COO Raul C. Lucero.

Ang presyo sa lana ug coal sa world market nagsugod og saka niadto pang Enero ning tuiga.

Tungod kay kadaghanan sa mga power generators naggamit man niini, misaka sab ang gastos sa pagpadayon sa ilang operasyon hinungdan sa pagpataas sa singil sa kuryente o Wholesale Electricity Spot Market (WESM) gikan sa P10 kutob P12.

Dili lang kini nasinati dinhi sa Sugbu kondili hasta sab sa Luzon ug Visayas kung diin dunay gisunod nga WESM.

Hinuon bisan og mimahal ang power generation rates ang Visayan Electric

distribution rate nagpabiling P1.5992/kWh gikan pa sa tuig 2014.

Aron dili modako ang bill, gitambagan sa Visayan Electric ang mga konsumidor nga ibton ang linya sa kuryente kun dili gamiton ug kondisyonon ang mga aircondition units, electric fans ug uban pa aron dili kini mokaon og dakong konsumo sa kuryente. -  Ian B. Melecio, BN Associate Editor (BANAT NEWS)