Pagdawat og walk-ins sa vaccination sites dili pa mapatuman

CEBU, Philippines — Ang kagamhanan sa Dakbayan sa Sugbo dili pa kini makapatuman sa pagdawat og walk-ins diha sa vaccination sites tungod kay taas ang turnout sa mga nagpabakuna sa siyudad.

Kini ang gibutyag ni Konsehal Dave Tumulak, miyembro sa vaccination board sa siyudad.

Matud ni Tumulak nga ang pagdawat og walk-ins posibleng adto lang mapatuman sa mga lugar nga menos pa ang nagpabakuna.

“Gi-encourage man nato atong katawhan nga magparehistro online kay ang atong Department of Health mohatag sila og bakuna base on the total number of registered vaccinee so daghan ang magparehistro daghan sab ang bakuna nga ihatag, kong gamay ang magparehistro gamay ra sab ang ihatag sa Department of Health”, matud ni Tumulak.

Sayo pa, ang Department of Health-7 niawhag sa local government units nga modawat og walk-ins sa mga vaccination sites kini aron mapaspasan ang inoculation ug malikayan nga adunay mausik nga bakuna.

Nasayran nga sa datos sa DOH-7 niabot sa 45 ka doses sa bakuna ang nausik, 13 niini AstraZeneca ug ang 15 ka doses sa Sinovac diin pipila ka rason niini mao nga wala mabutang og tarong sa storage facility ug adunay uban nga wala mahurot og gamit sama sa AstraZeneca multiple doses vials.

Si Dr. Van Phillip Baton, vaccination spokesperson sa DOH-7 niklaro nga ang pagdawat og walk-ins magdepende sa brand sa bakuna nga gamiton ilabi na sa mga multiple dose vials.

Subay niini, parehong temporaryong nipahunong sa ilang vaccination ang Lungsod sa Balamban ug Compostela tungod sa kakulang sa supply sa bakuna.

Ang maong nga lungsod nibahibalo niini diha sa ilang tagsa-tagsa ka face book page kalabot sa update sa ilang vaccination program.

Base sa Hunyo 22, 2021 nga datos sa Balamban anaa sa 62, 904 ang eligible nga makadawat og bakuna sa lungsod diin 3,884 na ang naturokan.

Sa maong gidaghanon, 2,877 ang nakadawat sa first dose samtang 1,007 usab ang nakadawat na sa second dose.

Sa Lungsod sa Compostela wala pa usab ang schedule sa ilang pamakuna tungod kay nagpaabot pa ang LGU sa dugang supply sa bakuna.

Base sa Hunyo 22, 2021 nga datos sa lungsod anaa na sa 1,331 ang ilahang nabakunahan diin 1,054 ang naturokan sa unang dose ug 277 ang nahuman na sa second dose. —Le Phyllis F. Antojado/BDB (BANATNEWS)