Pfizer vaccine sa Cebu City nahurot na

CEBU, Philippines — Nahurot na ang 21 mil ka doses nga Pfizer BioNTech COVID-19 vaccines nga gihatag sa Department of Health Central Visayas sa Cebu City matud pa ni Dr. Jeffrey Ibones, Officer-in-charge sa Cebu City Health Department.

Ang 21 mil ka doses gitunga alang sa first dose ug sa second dose ug ang para unang dose maoy nahurot kagahapong adlawa.

Matud niya paspas na karon ang ilang pagpamakuna sanglit 3 mil ka tawo na ang ilang mabakunahan kada adlaw sa mga vaccination sites sa siyudad.

Ang mga vaccination sites nga gipahigayonan sa vaccination sa Pfizer BioNTech COVID-19 vaccine mao ang Robinson’s Galleria, University of Cebu Senior Highschool building sa J. Alcantara Street sa Barangay Sambag ug ingon sa Banilad Campus.

 “Kung wala’y schedule nga second dose akong tan-awon ang schedule. Kung wala’y second, undang, pahuway sa ta gamay, paabot lang gyud ta sa ihatag sa Department of Health pero ako naman na-inform ang Department of Health ana unya hopefully karong Thursday naa man tingali maabot matagaan ta og allocation,” sigon ni Ibones.

Base sa datos sa Cebu City Health Department kapin 70 mil na ang nabakunahan sa first dose ug 25 mil na  ang fully vaccinated na.

Nangayo sab og pagsabot si Ibones sa mga tawo nga naa sa A4 category kay hangtud karon wala pay bakuna nga gitagan para kanila.

Sa pikas bahin, ang Dakbayan sa Lapu-Lapu makabakuna na og 600 ka tawo matag adlaw ang bag-ohay lang giablihang vaccination site diha sa City Auditorium sa Brgy. Poblacion.

Samtang gipangusgan sa Mandaue City ang pagparehistro sa mga gustong magpabakuna dungan sa pagpahimangno ngadto sa mga nabakunahan nga dili gihapon magkumpiyansa ug kinahanglang mosunod gihapon sila sa health protocols.

Giablihan na sab sa Dakbayan sa Talisay ang ilang ikatulong vaccination site diha sa us aka mall sa Brgy. Lawaan 1 hinungdan nga kapin usa ka libo na kan tawo matag adlaw ang ilang mabakunahan.

Base sa talaan sa DOH-7 nga gipagawas niadtong adlaw nga Lunes, ang Cebu City nakatala og dugang 10 ka bag-ong kaso ug 24 ka dugang nangaayo ug usa ang nakalas.

Samtang sa Mandaue City, duh aka bag-ong kaso ang natala, unom ang nangaayo ug way nakalas.

Ang Lapu-Lapu City nakatala sab og upat ka bag-ong kaso  ug 20 ka dugang nangaayo.

Gipanawagan sab sa konseho sa lungsod sa San Fernando ang mga neguysante sa ilang lugar mga mohatag og insentibo ngadto sa mga nakapabakuna na batok Covid-19 pinaagi sa gipasar nga ordinansa nga gipangamahan ni Konsehal Phillip Jude “PJ” Medalla atol sa ilang regular nga sesyon niadtong adlaw nga Lunes.

Sa kinatibuk-an ang Central Visayas dunay 69,053 total cases sa COVID-19; 6,516 ang active cases; 60,356 ang recoveries ug 2,181 ang deaths gikan sa pagsugod sa pandemiya sa miaging tuig. —Romeo Limpangog, Gabriel Bonjoc/IBM (BANATNEWS)