Duha naigo sa kilat patay
CEBU, Philippines — Duha ka mga lalaki nga nanguha og kinhason ang namatay human matud pa naigo og kilat atol sa pagbunok sa uwan kagahapon sa hapon diha sa Lato-an, Sitio Pajara Brgy. Umapad sa Dakbayan sa Mandaue.
Giila ni Umapad Barangay Captain Nelson Rubio ang mga nakalas nga mao sila si Rey Kuyam,28, lumad nga taga Bohol apan nag-abang diha sa Umapad ug Erwin Herason,30, taga Mantuyong sa mao gihapong dakbayan.
“Ang uban nanagan na pagkusog sa uwan pero nagpabilin ni sila didto sa dagat,mao ning silay maoy naigo,”matud ni Rubio.
Sa video nga gi-post sa usa ka netizen, ang ig-agaw ni Kuyam nga si Danilo Kuyam miingon nga pagsugod og ngitngit sa langit, dalidali silang nikawas gikan sa dagat apan nagpabilin ang duha. “Pagngitngit sa langit, aksyon mi og kawas, unya sila nagpabilin didto. Amo silang gi-roving bisan ngitngit, abi namo og bato ba, diha na sila sa dalan naghayang na,“ matud pang Danilo Cuyam, ig-agaw sa usa sa namatay sa post niini sa Facebook.
Ang desk officer sa Police Station 5 nga si Rey Batigdas miingon nga nadawat nila ang report alas 5:39 sa hapon ug atol ning pagsuwat sa balit padayon pa silang nangolekta og impormasyon bahin sa hitabo. —IBM (BANATNEWS)
- Latest
