IATF ug Cebu Protocols maoy ipatuman

CEBU, Philippines — Gipahibalo ni Presidente Rodrigo Duterte didto sa Malacañang niadtong nakalbay nga gabii nga ang Inter-Agency Task Force guidelines gyud alang niadtong mangabot gikan sa gawas nasud maoy kinahanglang sundon.

Epektibo kining nagpahunong sa panagbangga sa opinyon ug protokol sa probinsya sa Sugbu ug sa IATF nga pipila ka semana nang ginungtan sa mga tawo ilabi na sa Sugbu kun kinsay mas katuohan.

Tungod sa anunsyo ni Duterte, si Gob. Gwendolyn Garcia sa Sugbu mipahibalo nga iyaha kining tumanon agi og pagtahod sa mga polisiya sa otoridad sa nasudnong kagamhanan sa mga lokal nga kagmahanan.

Apan ang gitawag nga Cebu protocols magpadayon gihapon sa pagpatuman ug mahulog nga gitipo na kini sa IATF protocols bahin sa mga Overseas Filipino Workers ug mga Returning Overseas Filipinos. Ang Cebu protocol gipatuman subay sa Executive Order No. 17 ni Garcia nga gisagop ug gipalig-on Hunta Probinsyal nga mipagawas og Provincial Ordinance No. 2021-04.

Kini nagmando nga i-swab dayon ang tanang mangabot nga OFWs ug ROFs ug kun negatibo ug papuy-on sila og duha ngadto sa tulo ka adlaw sa hotels ayha sila papaulion ug sa ikapito ka adlaw usban sila og swab test ug kun negatibo gihapon adto gihapon nila ipadayon sa ilang balay ang kwarantina hangtud ika-14 ka adlaw. Ang sa IATF, dili i-swab test ang mangabot nga OFWs ug ROFs apan diretso silang i-kwarantina sa mga hotels ug sa ikapito ka adlaw ipaubos sila sa swab test ug kun negatibo tiwason nila ang napulo ka adlaw diha sa hotel ayha makapauli ug didto sa ilang lugar tiwason ang nahibiling upat ka adlaw nga kwarantina. Ang kalainan sa duha mao ang napulo ka adlaw nga pagpuyo sa hotel base sa IATF itandi sa duha ngadto sa tulo ka adlaw nga pagpuyo sa hotel ug adto na tiwason ang 14 ka adlaw nga kwarantina sa ilang mga panimalay.

Si Garcia miingon nga tungod kay nasudnong polisiya man ang gipatuman sa IATF mas palabihon kini nungka sa mga lokal nga polisiya. Apan magpadayon gihapon ang swab-upon arrival sa Cebu protocols ug kini libre.

Gibakwi na sab ni Garcia ang Executive Order No. 23 nga iyang giluwatan niadtong adlaw nga Lunes nga silotan kadtong dili motuman sa EO 17 ug P.O. 2021-04.

 “This executive order (EO No.23), I am now setting aside in difference to the president, even as we look forward to the scheduled meeting on the 28th of June with Sec Duque and the same technical experts who have advised the president last night (Hunyo 21,2021) as regards the need to strictly implement the IATF guidelines.

Nagpasalamat hinuon si Garcia kang Duterte nga gipaminaw niini ang mga rason ug pagila sa iyang hangyo para sa mga OFWs ug ROFs nga namauli dinhi sa Sugbu dili tungod lang kay magbakasyon kondili kadaghanan kanila emerhensiya ang rason sa ilang pagpauli.

Si OPAV Secretary Michael Dino sa iyang bahin miingon nga dako kini og pagsalig kang Duterte ug kang Garcia nga ang kaayohan lang sa katawhan maoy ilang gustong sigurohon, hiyas nga gikinahanglan sa tinud-anay nga lider.

Matud niya ang gihimo dinhi sa Sugbu base sa siyensiya, aktwal nga data ug tinuoray nga kasinatian dinhi. Kini maoy rason nga gipatuman kini dinhi ug gipresentar nila kang Duterte. Apan kay nitingog na si Duterte bahin niini, ilaha kining sundon.

Malaumon si Dino ug si Garcia nga paminawon ug hatagan og konsiderasyon sa IATF atol unya sa ilang himuong panagtigom karong Hunyo 28,2021 ang rason sa Sugbu. (BANATNEWS)