TPUJs wala mosunod sa health protocols
CEBU, Philippines — Nakadawat og mga reklamo ang Cebu City Jeepney Task Force (JTF) kalabot sa mga giingong wala pagsunod sa mga drayber sa mga Traditional PUJ sa mga health protocols nga kondisyon aron sila tugotang makapamasahero.
Sumala pa sa pangulo sa task force nga si Konsehal James Cuenco nga ilaha na karon nga gihan-ay ang mga reklamo ug makigkita sila sa Land Transportation and Franchising and Regulatory Board (LTFRB) aron ipatawag kining mga TPUJ drivers ug operators wala mosunod sa health protocols.
Kapin na sa 40 ka mga reklamo ang iyang nadawat ug ang kasagaran niini sobra sa limitasyon sa kapasidad nga gimando ang reklamo kay bisan puno na magpasakay gihapon kini.
Nakadawat usab siya og reklamo nga nagpasakay og mga pasaherong wala nag-face mask ug face shield.
Matud pa niya nga makabalaka gyud ang maong sitwasyon sanglit gibutang sa drayber sa peligro ang panglawas sa mga pasahero tungod sa risgo sa COVID19.
“Dili gyud ta mohatag og chance ana nila kay unfair man pud sa ubang drayber nga nituman gyud sa balaod,” si Cuenco nagkanayon .
Si Cuenco mao ang chairman sa committee on transportation sa Konseho sa Siyudad sa Sugbo.
Kahinumdoman nga niadtong Mayo 27, 2021, giisyu ni Mayor Edgardo Labella ang Executive Order 131 alang sa pagbukas sa tanan nga mga rota sa jeep sa Syudad sa Sugbo.
Ang mga drayber nga gusto mobalik og bjyahe kinahanglan nga mag-agi og seminar kalabot sa pagpatuman sa health protocols ug inspeksyonon ang ilang mga unit kun haom padaganon. —IBM (BANATNEWS)
- Latest