MOD personnel patabangon pagmentinar sa trapiko

CEBU, Philippines — Dunay 85 ka mga sakop sa Cebu City Market Operations Division(MOD) ang gipang-deputized aron motabang sa pagpanakop sa mga badlongong motorista nga mosulod sa nagkadaiyang merkado sa Siyudad sa Sugbo , ingon man usab sa mga tawong magpataka og labay sa ilang basura  sulod ug palibot sa merkado.

Suma pa sa pangulo sa MOD nga si Irvin Cabales gipaubos na og training ang iyang mga sakop sa Cebu City Transportation Office (CCTO) ug Cebu City Environment and Natural Resources Office (CCENRO).

Matud pa ni Cabales makatabang kining taga MOD paghapsay  sa dagan sa trapiko sa palibot sa merkado ug mabadlong kining magdala og mga sakyanan nga magpataka og parking aron magkarga sa ilang mga kinumpra.

Sa samang higayon mamentinar usab ang kalimpyo sa merkado tungod kay gitahasan sab sila pagdakop adtong magpataka og labay sa basura.

Magpabilin usab ang obligasyon sa MOD pagsita sa mga tawo sulod sa merkado nga dili magsuot og facemask.

Hugot usab nga gipatuman sa mga merkado ang physical distancing busa gid-an ang market vendors nga molapas sa ilang puwesto sa higayon mga mag-display sila sa ilang mga baligya aron dili maghuot ang mga tawo nga mangagi sa ilang area. —IBM (BANATNEWS)