Sunog P1.3M ang danyos

CEBU, Philippines — Nagbilin og P1.3 milyones nga danyos ang sunog nga niulbo sa may Gov. M. Ria St., Barangay Capitol Site ning Dakbayan sa Sugbo, kagahapon sa buntag.

Nadawat sa kabomberohan ang alarma alas-8:38 sa buntag ug hingpit nga napaawong pasado alas-9 na ug tulo ka balay ang hingpit nga naugdaw ug usa ang nakan-an sa kalayo.

Ang sunog giingong nagsugod sa balay  nga iya ni Lilia Young apan daghan ang nagpuyo.

Wala hinooy naangol o nakalas sa maong sunog, nga gibana-bana nga nidanyos og P1,350,000.

Matud pa ni Fire Officer 2 Fulbert Navarro, fire investigator sa Cebu City Fire Department, padayon pa silang nagimbestigar may kalabutan sa maong sunog  apan base sa pasiunang impormasyong ilang nadawat nagsugod kini sa usa ka kan-anan sa usa sa mga nagokupar. —IBM (BANATNEWS)