Face shields di na kinahanglan?
CEBU, Philippines — Gihangop ni Cebu City acting mayor Michael Rama ang pamahayag ni Presidente Rodrigo Duterte nga sa mga hospital na lang himuong obligado ang pagsul-ob og face shields.
Suma pa ni Rama nga kun mopagawas gani ang Inter-Agency Task Force og kamandoan kalabot niini iyaha dayon kining sagupon dinhi sa siyudad kay matud niya praktikal kini.
Gimando sa IATF nga kinahanglan gyud magsul-ob og face shield sulod sa mga establisamento ug pampublikong transportasyon. Apan naobserbahan ni Rama nga kasagaran sa mga tawo ang wala gyud mogamit og face shields ug ang uban dili gani tarungon pagsuot kay gihimong head band.
Si Rama midugang nga bisan og kun dili na kini ipagamit iyang gihangyo ang publiko nga dili gihapon mokompiyansa ug magbinantayon gihapon aron malayo sa risgo sa COVID19. Gihangop sa katawhan ang Tweet ni Senador Tito Sotto, nga nag-ingong nitugot na si Presidente Rodrigo Duterte nga mag face shield lang sa mga tambalanan.
Si Yvonne Padica Williams, nitug-an nga uyon siya nga dili na mag face shield kay dili siya komportable gumikan kay lisod moginhawa ug alimoot.
Si Johnie Gelbolingo miingon nga gawas sa kahasol pagsuot niini ilabi na sa mga senior citizens dugang sab kini nga gastos kay gikinahanglan man mopalit niini aron makasulod sa mga establisamento.
Apan ang tigpamaba sa Department of Health Dr. Mary Jean Loreche miingon nga dugang proteksyon ang face shields.
“This may be a welcome decision by most of our people. Whilst it is true that there is no solid data that will prove its effectiveness in further shielding us from contracting the virus, we need to consider that face shields is just one of the many layers that we need to protect us,” pasabot pa ni Loreche.
Sumala pa ni Loreche kinahanglang ipadayon ang paggamit niini sa mga healthcare workers ang ilabi na kung wala kaayo mapatuman ang physical distancing ug sirado ang nahimutangan.
Apan ang tigpamaba sa Malacañang kinsa mao sab ang tigpamaba sa IATF nga si Harry Roque miingon nga samtang tuod og ang pamahayag ni Duterte mamahimo unyang polisiya, apan makaapelar pa gihapon ang IATF batok niini. —Rowena D. Capistrano/IBM (BANATNEWS)
- Latest