Usa patay, usa angol sa pagpamusil
CEBU, Philippines — Usa ang patay ug laing usa ang angol sa pagpamusil diha sa Chinese Cemetery sa Barangay Carreta, Dakbayan sa Sugbo kagahapon sa kadlawon.
Ang namatay usa ka lalaki nga gibana-banang nagpangedaron sa 30-anyos kinsa nakaangkon og duha ka samad pinusilan sa ulo ug hangtud sa oras sa pagsuwat sa balita wala pa kini mailhi.
Samtang ang naangol mao si Richard Tuñacao, hingkod ang panuigon, nagpuyo diha sa maong sementeryo. Ang suspetsado giila nga si Manuel Ylaya, alyas “Cyborg” o “Bulhog”, hingkod usab ang panuigon ug residente sa maong lugar.
Ang kapolisan sa Mabolo Police Station ubos sa supervision ni Police Major Renz Talosig ang daling niresponde sa maong hitabo.
Ang hepe sa tanod sa Barangay Carreta nibutyag sa kapolisan nga nakabati sila og pipila ka buto sa armas ug gisusi nila kini diin ilahang naabtan ang nahisgutang biktima nga nagbuy-od na diha tunga-tunga sa karsada sa sementeryo
Matud sa mga tanod nga pipila ka metros gikan sa ilang nahimutang ilahang nadungog nga adunay naghilak nga nangayo og tabang diin nakita nila si Tuñacao nga nagkadugo ug dali nila kining gidala ngadto sa Cebu City Medical Center.
Base sa imbestigasyon sa kapolisan nasuta nga ang mga biktima lakip na ang suspetsado parehong drug personalities diha sa lugar ug si Tuñacao nitug-an sa mga polis nga si Ylaya ang namusil kanila.
Nakuha gikan sa lugar nga nahitaboan ang upat ka kabhang sa bala sa kalibre.45. —BDB (BANATNEWS)
- Latest
