EOC miumol og grupo nga mosusi sa mga kan-anan
CEBU, Philippines — Ilusad na karong Biyernes, Hunyo 18 ang walo ka team nga gihulma sa Cebu City Emergency Operations Center (EOC) ug Cebu City Business Permit and Licensing Office (BPLO) aron mohimo og lapad nga surprisang operasyon sa mga restaurant , bar , coffee shop ug uban pa nga klase sa kan-anan.
Tumong niini nga matuldokan na ang nabatasan sa mga tawo nga dili gyud magsul-ob og face mask sa tibuok higayon kun naa na sila sulod sa kan-anan.
Matud pa sa head sa BPLO nga si Atty. Jared Limquiaco nga hasol gyud tinuod ang pabalik-balik nga pagtangtang ug pag-sul-ob og face mask sulod sa kan-anan apan mao kini ang usa sa mga pamaagi nga malikayan ang transmisyon sa COVID19 ug malikay ang siyudad sa pagsaka sa quarantine status.
Nasayran nga nagpabilin ang siyudad sa medyo luag nga quarantine status partikular na ang modified general community quarantine (MGCQ).
Matud pa ni Limquiaco nga importante usab kaayo ang kooperasyon sa operators sa establisamento nga motabang og badlong sa ilang mga kustomer nga wala motuman sa health protocols.
Sa nangaging pamahayag sa head sa EOC nga si Konsehal Joel Garganera, nitataw kini nga kinahanglan nga itaod dayon og balik ang face mask sa higayon nga mahuman na og kaon ug inom.
Gitambagan usab niya ang publiko nga dili magtabi samtang nagkaon.
Matud pa ni Garganera nga dili gyud sila magduha-duha sa pagpahamtang og tukmang silot alang sa mga dili mopatuman og health protocols. —MEL (BANATNEWS)
- Latest