Off-site registration gibalik sa COMELEC
CEBU, Philippines — Gibalik na sa Commission on Election (COMELEC) ang ilang off-site registration ug gani sa Cebu City gisugdan kini sa miaging buwan ug giuna nila ang mga bukirang Barangay.
Matud ni Narciso Bendulo Jr, Election Assistant II gi-una nila ang mga mountain Barangays sa Cebu City ug nahuman na sila sa Barangay Agsungot, Mabini ug Lusaran.
Kini sa tuyo nga dili na sila kinahanglan pa moadto sa buhatan sa COMELEC nga layo sa ilaha ug aron dili na sab kinahanglan mogasto og plete.
“Layo man gud, tagaan nato og chance tawon ang tua sa layo nga di na gyud sila moari sa opisina, layo baya kaayo, imagine ang Lusaran one hour na pag-travel didto, so layo maong atong giadto para gyud sila makarehistro”, sigon ni Bendulo.
Karong Sabado dunay mahitabong off-site registration sa Barangay Lahug, adto kini ipahigayon sa Lahug Elementary School.
Samtang sa gawas sa buhatan sa COMELEC Cebu City daghan gihapon ang naglinya nga dunay lain-laing katuyuan lakip na niini ang pagparehistro, transfer of residence, reactivation, corrections ug uban pa.
Giawhag sa COMELEC ang katawhan nga magparehistro aron makabotar sa umaabot nga Mayo 9, 2022 nga Local ug National Elections. —Leonel B. Quillo /MEL (BANATNEWS)
- Latest