Vaccination sites sa Lapu-Lapu temporaryong gisirado
CEBU, Philippines — Temporaryo nga gisirado sa kagamhanan sa Dakbayan sa Lapu-Lapu ang operasyon sa ilang mga vaccination site sugod kagahapon.
Kini tungod sa pagkahurot na sa ilang supply sa bakuna batok sa COVID-19.
Si Atty. James Sayson sa City Legal Office nagkanayon nga duha ka vaccination sites ang temporaryong gisirado mao ang Gun-ob Elementary School ug Barangay Agus Gymnasium.
Samtang karong adlawa laing vaccination sites sa Hoopsdome sa Barangay Gun-ob ang buksan sa kagamhanan sa siyudad. Ug dugang vaccination sites ang buksan usab karong Biyernes diha sa city auditorium nga nahimiutang sa city hall compound. Matud ni Sayson nga ang maong vaccination sites maoy moatiman sa inoculation sa Pfizer vaccines.
Dugang ni Sayson nga ilang gipaabot ang supply sa diluent ug syringes gikan sa Department of Health nga maoy gamiton sa Pfizer inoculation.
Samtang si Mayor Junard “Ahong” Chan niawhag sa mga Oponganon nga wala pa makaparehistro online nga mobisita lang sa ilang link nga https://lapulapucity.vims.com.ph. Rowena D. Capistrano/BDB (BANATNEWS)
- Latest