Tanke Defenders gitudloan sa paggamit og Arnis

CEBU, Philippines — Ang mga sakop sa Tanke Defenders gitudloan sa kapolisan sa Dakbayan sa Talisay sa pamaagi sa paggamit og arnis nga ibunal sa mga tawo nga badlongon nga magsamok-samok diha sa ilang lugar.

Ang kapolisan sa Dakbayan sa Talisay nihangyo nila ni GM Danilo Jorquia, Felix Ybañez Jr., Niño Jesus “Rocklobster” Zapanta ug Noel Echavez nga motudlo sa mga indibidwal kinsa niboluntaryo sa pagprotekta sa ilang lugar.

Si Police Lieutenant Noel Lungcob nihatag kini og mensahe alang sa paghatag og kaisog ug kaalam sa mga sakop sa Tanke Defenders.  Ang Tanke Defenders maoy motabang sa kapolisan sa pagpatrolya diha sa ilang lugar sa pagsiguro nga ang mga ilegalista manghawa diha sa Tanke.

Gawas sa pagtudlo sa arnis gibansay usab sila sa pag-aresto ug pagposas ug gi-edukar usab sila kabahin sa kaso sa pagpayuhot og ilegal nga drugas.

Sa laing bahin, gipaubos sa kinalit nga drug test kagahapon sa buntag ang mga sakop sa force multipliers sa Lungsod sa Minglanilla.  Si Noel Noe, pangulo sa Municipal Anti-Drug Abuse Council sa Minglanilla nagpatawag og tigom sa mga force multiplier aron motungha gyud ang tanan sa pagpahigayon og kinalit nga drug test. Ang mga sakop sa Rural Health Unit maoy nagpahigayon sa drug testing.

Gipaabot pa nila ang resulta sa maong drug test. BDB (BANATNEWS)