Asa na ang mga bakuna?

CEBU, Philippines — Padayong nagpaabot ang Cebu City sa dugang supply sa Pfizer BioNtech vaccines nga nangabot na pipila ka adlaw na ang nakalabay ug anaa pa gihapon karon sa DOH-7.

Si Cebu City Councilor Dave Tumulak nahibulong kun unsay hinungdan nga hangtud karon wala pa i-release ang maong mga bakuna nga gitagana para sa mga LGUs sa Metro Cebu.

Sa miaging semana nangabot dinhi sa Sugbo ang 210,000 doses nga Pfizer BioNTech Corona Virus Disease(COVID)-2019 vaccines nga matud pa sa DOH-7 para sa Metro Cebu. Sumala pa ni Tumulak, base sa nahipos niyang kasayuran makadawat matod pa og 21,060 doses, Mandaue City 21,060 doses, Lapu-Lapu City 23,400 doses, Minglanilla 11,700 doses, Talisay City 7,020 doses, Naga City 18,720 doses.

“Wala pa gyud hibaw-i kanus-a maabot pero si Dr. Loreche base sa amoang chat group nag-ingon nga sa higayon mahatag na kining Pfizer vaccines sa mga Local Government Units gipahinumduman ang atong katawhan nga kini para lamang sa priority A1 which is medical frontliners, A2 sa mga senior citizens, A3 para sa mga with comorbidity and A5,” matud pang Tumulak.

Wala’y labot niini ang mga naa sa A4. Kini nga Pfizer gikan sa COVAX facility ug giingong dunay kasabutan ang nasudnong kagamhanan u gang maong pasilidad nga  alang ra gyud kini sa maong nahaunang priority groups.

Ang A4 mao kadtong mga empleyado sa pribado ug publikong ahensiya sa gobiyerno. Ang tanang bakuna nga gikan sa COVAX pulos kini donasyon.

Ang konsehal miingon nga daghang mga tawong nagpaabot magpabakuna apan wala silay ikahatag nga schedule kay wala pay bakunang naabot sa dakbayan.

Si Cebu City health officer Dr. Jeffrey Ibones nangayo og dugang pailob sa mga tawong nagparehistro sa A4 priority group kay hangtud karon wala pay gi-release nga bakuna ang DOH-7 para nila. 

Sa uwahing talaan dul-an 39 mil na ang nagparehistro online nga nalakip sa A4 category nga mga trabahante gikan sa nagkadaiyang industriya sama sa nagtrabaho supermarket , media , transportation sector, delivery services , vendors ug uban pa.

Dinhi sa Cebu City, kapin na sa 64 mil ang nabakunahan alang sa first dose, samtang 24,000 sa ikaduhang dose.

Sa kinatibuk-an, kapin na sa 206,000 ang nagparehistro online gikan sa nagkalain-laing kategoriya.  —Sanden J. Anadia/IBM (BANATNEWS)