Napatay sa drugbust mga guns-for-hire

CEBU, Philippines — Gikuha na sa iyang kabanay ang usa sa tulo nga suspetsado nga napatay pinusilay sa kapulisan atol sa usa ka anti-drug operation sa Barangay Taptap, Cebu City kaniadtong Huwebes sa gabii. Ang patay’ng lawas ni Christopher Lim alyas Christopher Aparece gikuha na sa iyang pamilya kaniadtong Domingo, Hunyo 13,2021.

“Ang kining duha, remaining naa pa gihapon sa Rolling Hills, unya wala pa gihapon ni claim nga tagtungod,” sigun ni Police Lt. Colonel Wilbert Parilla, Deputy City Director sa Operations sa Cebu City Police Office (CCPO).

Basi sa imbestigasyon nga gisumiter sa Philippine Drug Enforcement Group (PDEG) Special Operation Unit sa Rehiyon 7, giingon ni Parilla nga si Aparece ug isa pa nga napatay nga drug suspect nga si Boyet Rama nasikop na kaniadto sa San Fernando Police Station tungod sa sunod-sunod nga insidente sa pagpamusil.

“They are also considered as guns for hire and another information given to us is miyembro sad diay ni sila diha sad og kulto nga naa silay gituohan nga agud-agud,” sigun ni Parilla.

Ang mga napatay giingong nalambigit na karon sa ilegal nga drugas ug nagsilbing lokal nga tigsuplay sa drugas gikan sa Manila. Matud pa taga Cebu ilang supplier nga toa na nagbase karon sa Manila.  Kaniadtong Huwebes sa gabii, Hunyo 10,2021, ang mga mga sakop sa sa Police Drug Enforcement Group -7 nilusad og buybust operation batok sa grupo diha sa Campo 4 sa Dakbayan sa Talisay apan human sa transaksyon gipusil sa usa ang poseur buyer nga polis, swerte lang nga naka-bulletproof vest kini ug wala magrabihi. Ang namagay ug laing duha ka kauban nagsakay og awto pagikyas apan nasangit sila sa police checkpoint nga daling gilusad sa nagkadaiyang police units sa rehiyon nga niresulta sa shootout ug gikamatay nilang tulo. Giila sa kapulisan ang duha nga nahabilin nga mga patay nga lawas mao sila Libon Kerr Bargayo ug Boyet Rama.

Nagtuo si Parilla nga tungod sa kamatayon sa tulo ug pagkasakmit og napulo ka kilong shabu, maapektahan niini ang supply sa shabu sa rehiyon ilabi na sa Sugbu.— IBM (BANATNEWS)