_banat
^

MCIA andam na sa pagbalik sa flights

Le Phyllis Antojado (Banat) - June 13, 2021 - 12:00am

CEBU, Philippines — Andam na ang tanan sa pagbalik unya sa international arrivals diha sa Mactan Cebu International Airport  karong adlawa, kini samtang wala pay giluwatang bag-ong direktiba ang Malacañang kun lugwayan pa ang pagpa-divert sa tanang inbound international flights didto sa Ninoy Aquino International Airport sa Manila. “While  waiting we can declare that we are ready should there be no more extension,”  matud pang Atty. Glenn Napuli, officer-in-charge sa Mactan Cebu International Airport kagahapon.

Sa pagsuwat ning balita kagahapon alas-5 sa hapon, si Napuli miingon nga wala pa silay nadawat nga memorandum gikan sa Palasyo kung lugwayan pa ang diversion sa flights.

Gipahibalo niya nga dunay flight gikan sa Singapore nga dunay 150 ka pasahero ang gikatakang motugpa sa MCIA alas-2 sa hapon ug laing flight sab gikan sa South Korea ang moabot alas-10 sa gabii sakay ang 150 sab ka pasahero.

“Cebu is united to stick to what we believe is right,” matud pang Napuli bahin sa gisagop nga swab-upon-arrival policy ug mental health lectures sa mangabot nga mga pasahero nga pagabuhaton sa mga sakop sa Department of Health. Matud niya nga dunay singko mil ka lawak sa nagkadaiyang hotels nga mahimong maestaran sa mga OFWs ug ROFs.  Gani giingon niini nga mas daghan na karong lawak ang gibuksan ubos sa OWWA hotel rates alang sa OFWs. Sa laing bahin, nadugang si Senador Richard J. Gordon sa mga magbabalaod nga nakauyon ug nisuporta sa polisiyang gipatuman sa Sugbo alang sa mga OFWs ug ROFs.

Gidayeg niya si Gobernador Gwendolyn Garcia ug mga lokal nga opisyales sa Cebu sa ilang inisyatiba nga haom sa kulturang Pilipino nga pirmeng moduaw sa mga paryente.

Matud sa senador, ang taas nga kwarantina nakapuno sa kahasol ug gastos sa mga OFWs ug ROFs. Apan dili siya pabor nga swab-upon-arrival nga gihimo sa Sugbo tungod kay wala kini girekomendar sa mga health experts ug wala sab nagsunod sa polisiya sa nasudnong pangamhanan sa pakigbatok sa Covid-19.

Matud niya paigo na ang pito ka adlaw nga kwarantina dayon ug pagkuha og swab anang panahona. Kadtong negatibo papaulion ug adto na humanon sa ilang balay ang kwarantina samtang ang positibo ipaubos dayon sa isolation.

Dugang pa sa senador, ang mga lokal nga opisyales maoy nasuhito sa aktwal nga sitwasyon sa ilang lokalidad aron mas epektibo ang proteksyon sa ilang mga konstituwente.

Ang tigpamaba sa Palasyo nga si Harry Roque miingon nga wala pa siya masayod kun malugwayan pa ang flight diversion nga gitagalan kutob lang kagahapong adlawa.

 Si Gordon misugyot sab sa hinayhinay nga pagabli sa bubble tourism sites aron mabuksan ang ekonomiya, samtang tugotan na unta ang ubang mga balay patigayon dungan sa agresibong pagpamakuna. Uyon sab siya nga paluagan ang protokol sa mga pasaherong mangabot sa Pilipinas, lakip na mga turista basta kompleto na sila sa bakuna ug dili na sila kinahanglan pang i-swab test pa.— /IBM (BANATNEWS)

MCIA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with