7 ka lungsod, 1 ka siyudad makadawat og insentibo

CEBU, Philippines — Pito ka mga lungsod ug usa ka dakbayan sa Lalawigan sa Sugbo ang nakakab-ot sa target nga gidaghanon sa mga bata nga angay bakunahan batok tipdas ug polio subay sa Chikiting Ligtas immunization program sa Department of Health (DOH) uban ang Probinsya sa Sugbo.

Ang Provincial Health Office (PHO) nibutyag nga ang Dakbayan sa Carcar uban ang mga lungsod sa Alegria, Borbon,  Compostela, Daan Bantayan, Santa Fe, San Remegio ug Tabuelan maoy nakakab-ot sa target.

Sa report sa Sugbo News ang gidumala nga news portal sa Probinsya sa Sugbo, ang maong mga lungsod ug syudad maoy nakaabot sa 95% nga ilang target nga bakunahan sa mga bata nga nag edad og 9 ka bulan hangtud 59 ka bulan alang sa tipdas ug bag-ong natawo nga bata hangtud sa 59 ka bulan alang sa polio.

“Hopefully ma maintain nato na nga maminus ang measles cases and also ang polio and also thankful ta sa mga health workers nga ma reach nila ang target nga 95% “matud ni Dr. Christina Giango ang pangulo sa PHO.

Tungod kay nakab-ot man sa maong mga LGUs ang target, sila makadawat og insentibo gikan sa kapitolyo subay sa saad ni gobernadora Gwendolyn Garcia.

Sama sa Alegria nga sumala sa Kapitolyo nakadawat na og P105k nga cash incentives ug certificate nga personal nga gitunol ni Gwen niadtong Hunyo 8, 2021 atol sa second round sa caravan of services sa Cebu Provincial Government.

Ang maong immunization program sa DOH gilusad kini sa Probinsya sa Sugbo niadtong bulan sa Enero karong tuiga, alang sa kampanya niini nga malikay ang mga bata sa mga sakit sama sa tipdas ug polio. MEL (BANATNEWS)