Turismo sa Lungsod sa San Remigio nakabangon na

CEBU, Philippines — Nakabangon na gyud ang istado sa turismo sa Lungsod sa San Remigio ug ubay-ubay na nga mga resort ang nisulbong sa maong dapit. 

Suma pa ni Konsehal Alfie Corominas Gonzales nga gipaneguro sa mga tag-iya og resort nga mapatuman ang istrikto nga health protocols, aduna pud silay mga panagtigom sa resort operators aron usab pagpahinumdom sa ilang mga obligasyon.

Una na nga gipasigarbo sa kagamhanan sa Lungsod sa San Remigio nga sukad sa pagbukas sa ilang turismo, ang mga resort diha sa lugar pulos nituman sa health protocols.

Gidugang ni Gonzales nga subsub karon ang ilang kampanya sa pakigbatok sa COVID-19 hinungdan nga dako kaayo og tabang ang gibuhat nga kooperasyon sa mga tag-iya og resort diha sa ilang dapit.

Ang San Remigio adunay 20 ka resort ug pulos na kini nakabalik sa ilang operasyon.

Gipaabot usab ang pagdagsa sa mga bisita sa maong dapit ilabi na panahon sa weekend ug holidays.

Gipaneguro usab sa kagamhanan sa lungsod ang pagmentinar sa kahapsay ug kalinaw.

 Usa sa ilang gikampanya ang pagtuman gyud sa social distancing diin usa kini sa mga pamaagi nga malikayan ang transmisyon sa COVID-19. MEL (BANATNEWS)