Mga ATM booths pabutangag disinfectants

CEBU, Philippines — Giawhag sa Konseho sa Dakbayan sa Sugbo ang tanang bangko sa siyudad nga magbutang kanunay og alcohol-based hand sanitizers diha ilang mga Automated Teller Machines( ATMs) booths.

Kini agi og pagtabang nga mapugngan ang pagtakod-takod sa mga kagaw ilabi na karong dunay pandemiya sa Covid-19. Kinahanglan nga kini naa lang sa tupad sa ilang ATMs aron dali rang magamit sa mga tawo.

Si Konsehal Raul Alcoseba mi-sponsor og resolusyon labot niini nga giaprubahan sa konseho sa siyudad niadtong Miyerkules.

“This representation observed that some Automated Teller Machines (ATMs) booths in Cebu City lacks or wanting in provisions of alcohol-based hand sanitizers for ATM users,” sigon ni Alcoseba.

Ang pagbutang og alcohol-based hand sanitizers alang sa mga ATM users sa siyudad matud pa makatabang nga mapugngan ang pagkatap sa COVID-19.

Gibase kini ni Alcoseba sa pamahayag sa World Health Organization(WHO) wala’y kompirmadong panahon kun kanus-a hangtud kanus-a mamatay o magdugay ang virus sa maong sakit.

Base sa pagtuon ang coronaviruses maka-survive sa bisan unsang butang nga matugpahan niini ug magdepende sa kondisyon sa lugar sama sa klase sa nataptan, temperatura ug uban pa, ang gidugayon nga magpundo ang virus.

Aron mapugngan ang pagkatap sa kagaw ingon man sa COVID-19, ang Centers for Disease Control and Prevention (CDCP) nirekomendar sa kanunay nga paghugas sa kamot gamit ang sabon ug tubig gumikan kay makatabang kini aron mawala ang kagaw ug bisan unsang kemikal sa kamot.

Apan kun wala’y sabon ug tubig, ang paggamit og hand sanitizer nga dunay 60 percent alcohol makatabang sa tawo aron dili masakit ug malikayan ang pagkatap sa kagaw ngadto sa uban.

Ang ubang pamaagi mao ang pagsul-ob og facemask, paglikay sa paghikap sa mata, ilong ug baba, pagsunod sa social distancing ug paglimpyo ug pag-disinfect kanunay sa butang nga pirmi mahikapan. —/IBM (BANAT NEWS)