CEBU, Philippines — Gipangandaman sa kadagkoan sa Talisay City National High School ang padagsa unya sa mga kabataan nga gustong magpa-enroll karong tuig sa ting eskwela.
Si Edmon Alido, principal sa maong tunghaan nagkanayon nga sayo pa lang niabot na sa 600 ka bata ang nagpa-enroll nga mosaka sa grade 7 ug grade 11.
Matud ni Alido nga kaniadto sa pagsugod sa pandemiya gipaagi sa box registration ang ilang enrolment apan karon kinahanglan na ang ginikanan o guardian ang moadto sa tunghaan human nga giloagan ang estado sa kwarantina.
Gilaoman nila ang mga transferee gikan sa pribadong tunghaan ug dugang pa unya nga 8,000 ka tinun-an ang posibleng magpa-enroll sa ilang tunghaan karong tuig sa pagtungha.
Sa laing bahin, si Mayor Junard “Ahong” Chan ang pabor sa pagpatuman sa limited face-to-face classes.
Gibutyag ni Chan nga adunay mga tulunghaan nga nakahimo na sa ilang pagpangandam sa face-face classes. Nasayran nga gipahibalo na sa Department of Education-7 nga 50 ka publikong tulunghaan alang sa basic education sa Central Visayaas ang mopatuman sa limited face-to-face classes. Gisumitir na sa maong ahensiya ang listahan sa maong mga tulunghaan ngadto sa ulohan nilang buhatan. Si Chan nagkanayon nga 50 porsyento lang sa kapasidad sa usa ka classroom ang iyang itugot. Romeo T. Limpangog/BDB (BANATNEWS)