NOAH wala na manawat og pasyente sa COVID-19

CEBU, Philippines — Sugod niadtong Mayo 5, 2021 ang New Normal Oasis for Adaptation and a Home(NOAH) complex diha sa South Road Properties wala na manawat og COVID-2019 patients.

Kini tungod kay karong adlawa matapos na ang Memorandum of Agreement tali sa kagamhanan sa Dakbayan sa Sugbo ug Bigfoot Studios.

Nasayran nga ang Bigfoot Studios nag-abang og luna diha sa SRP ug ang maong luna gitukoran og building nga mao ang NOAH complex alang sa pasyente nga nataptan og COVID-19 ug libre kini nila nga gipagamit sa siyudad.

Sa pagkatapos na sa MOA tali sa siyudad ug Bigfoot ang management sa NOAH gihatagan og hangtud sa Mayo 31 aron makapanghipos. Nasuta nga aduna pay 30 ka COVID-19 patients diha sa NOAH hinuon motapos na kini sa ilang isolation niining buwana. Si Cebu City Mayor Edgardo Labella nagpasalamat sa Bigfoot Studios tungod sa pagpagamit niini sa siyudad sa luna sulod sa usa ka tuig ug dako kining tabang sa pagkigbatok sa COVID-19.

Gihangop usab ni Labella ang pagdumala nila ni Atty. Jocelyn Pesquera, NOAH manager ug Kosehal Donaldo “Dondon” Hontiveros, assistant manager.

Si Labella niawhag sa katawhan nga padayon nga motuman sa minimum health protocols ug dili mokompiyansa aron magpadayon ang pag-ubos sa kaso sa COVID-19 sa Cebu City. “Kung magpadayon ta sa atong pagka-compliant, wear mask, face shield, wash hand, social distancing nagtuo ko nga dili na kinahanglan pa atong dugangan atong isolation facilities kay maayo man ta og lakaw sa pagkakaron, salamat sa EOC, salamat sa City Health”. BDB (BANATNEWS)