CEBU, Philippines — Nanawagan si Mayor Edgardo Labella ngadto sa mga nagdumala sa swab testing operations alang sa mga namauli nga Overseas Filipino Workers (OFW) nga mangita og pamaagi nga mapadali ang paggawas sa resulta.
“Mas maayo nga dili malangay ang paghatag sa resulta aron dili intawon matanggong ang atong mga OFWs,” suma pa ni Labella kinsa nagtuong naghinam-hinam na silang makahimamat sa ilang mga pamilya .
Si Labella niuyon sa baruganan ni Gobernador Gwendolyn Garcia nga dili lisud-lisoron ang OFWs sa ilang pagpauli dinhi sa ilang mga pamilya.
Si Labella miingon nga dili na kinahanglan pa ang mandatory quarantine kun negatibo sila sa RT-PCR Test diha sa airport.
Kadtong mga napositibo sa COVID19 motabang ang siyudad pagpahiluna kanila diha sa mga barangay isolation centers.
Kadtong dunay mild symptoms mahimo silang dad-on sa Cebu City Quarantine Center (CCQC).Kun grabe dalhon na gyud kini og mga tambalanan.
Sa pagkakaron, samtang nagpaabot sa resulta ang mga OFW’s, anha sila mopuyo sa hotel nga accredited sa Department of Tourism (DOT) ug sa Department of Health.
Apan ang OFWs nga mopili nga adto sa hotels paabuton ang resulta, sila maoy mobayad niini. Sa pikas bahin, 569 nalang ang aktibong kaso sa Covid-19 sa Cebu City sumala pa sa datos nga gipagawas sa Department of Health Central Visayas niadtong adlaw nga Huwebes.
Nianang adlawa, ang siyudad nakatala og dugang 38 ka bag-ong kaso apan adunay 55 ka dugang nangaayo.
Ang Mandaue City nakatala sab og 11 ka bag-ong kaso ug karon 240 ang ilang aktibong kaso apan dunay 24 nga bag-ong nangaayo.
Samtang ang Lapu-Lapu dunay 350 aktibong kaso ug 80 ang dugang nangaayo sa samang adlaw.
Sa datos sa DOH-7, ang Central Visayas dunay 58,338 total cases sa COVID-19; 3,477 ang active cases; 52,836 ang recoveries ug 2,025 ang deaths.— Decemay P. Padilla/IBM (BANATNEWS)