Diskwento para sa nabakunahan giduso

CEBU, Philippines — Usa ka resolusyon ang gipasar ang Konseho sa Siyudad sa Sugbo nga nag-awhag sa mga negosyante nga hatagan og freebies , promo, o diskwento ug uban pang pahalipay ang ilang mga kustomers nga nahuman na sa pagbakuna batok COVID19. 

Giingong doble ang igo niini, makatabang kini sa pagbangon sa ekonomiya sanglit dugukon ang ilang mga tindahan ug sa susamang higayon madasig nila ang ubang katawhan  nga magpabakuna na.

Kinahanglan lang sa mga tawong nabakunahan nga ipakita ang pruweba nga sila nabakunahan na.

Pipila sa mga matang sa negosyo nga giawhag nga magmugna og promo  mao ang  grocery stores o supermarkets, restaurants, online food business, gyms/ spa, hotel, botika , tourist spots, public transportation, retail stores ug uban pa ng service-oriented establishments.

“Aside from implementing a comprehensive and well-planned public education drive about COVID-19 vaccine, one strategy that could help encourage positive health-related choice which in this case, getting the jab, is the use of reward and incentives through the involvement of the business sector,” suma pa ni Konsehal  Alvin Dizon kinsa maoy sponsor sa resolusyon.

Matud pa sa konsehal, duna pa gyuy mga tawong nagduha-duha sa pagpakuna busa wala puas ang kagamhanan sa pagdasig sa ilang mga konsituwente nga magpabakuna gyud.

Advertising
Scroll to continue

Sa lain bahin , gipahibalo ni Mayor Edgardo Labella nga wala ra siyay gibati nga  side-effects human sa iyang pagpabakuna sukad niadtong Mayo 4.  Busa gidasig niya ang tanan nga magparehistro na sa vaccination program sa siyudad.

Nalakip si Labella ug iyang asawa  sa A2 category o sa mga senior citizen ug nakadawat na siya sa unang dose sa coronavirus disease vaccine  nga Sinovac.

Gawas kang Labella ang laing mga opisyales sab sa siyudad kay nabakunahan napud lakip nila ni Vice Mayor Michael Rama ug pipila ka konsehales.

Nagkanayon si Labella nga dili angay magsalig sanglit nagpabilin gihapon ang presensya sa virus sa palibot.

Matud pa niya nga importante kaayo ang pagtuman sa health protocols aron malikay nga matakdan. —IBM (BANATNEWS)

Show comments