30 ka brgy sa Cebu City walay transmission sa COVID-19

CEBU, Philippines — Niabot na ngadto sa 30 ka barangay sa Dakbayan sa Sugbo ang giingong walay transmission sa COVID-19 sulod sa napulo ka adlaw.

Matud ni Konsehal Joel Garganera, deputy chief implementer sa Emergency Operations Center nga sa 80 ka barangay sa siyudad, 50 niini ang adunay transmission samtang ang 30 walay kaso sa COVID-19 sulod sa napulo ka adlaw. Apan si Garganera niawhag sa katawhan nga padayon gihapon nga mosunod sa tanang health protocols bisan sa maong kalamboan.

Subay niini, ang Cebu City nakatala kini og 21 ka bag-ong kaso sa COVID-19 diin  aduna na kini 23,750 ka kinatibuk-ang kaso ug 604 na lang ang active cases.

Ang siyudad adunay 55 ka dugang recoveries ug adunay 22,289 ka kinatibuk-ang recoveries ug 857 ang gidaghanon sa nangamatay lakip niini ang lima nga nadugang.

Samtang ang Mandaue City nakatala og duha ka bag-ong kaso diin aduna kini karon 6,448 ka kinatibuk-ang kaso, 216 ang active cases, 5,971 ang kinatibuk-ang recoveries lakip niini ang 29 nga nadugang ug 215 ang nangamatay.

Ang Lapu-Lapu City adunay 6,292 ka kinatibuk-ang kaso, 408 ang active cases, 5,718 ang recoveries ug 166 ang nangamatay lakip niini ang usa nga nadugang.

Base sa datos sa DOH-7, ang Central Visayas adunay 57,786 ka kinatibuk-ang kaso, 3,436 ang active cases, 52,335 ang recoveries ug 2,015 ang nangamatay. —Decemay P. Padilla/BDB (BANATNEWS)