Kaso batok sa mga suspetsadong abortionist gipasaka sa korte
CEBU, Philippines — Gisaka sa Cebu City prosecutor ngadto sa korte ang kasong attempted intentional abortion batok sa upat indibidwal nga nadakpan sa National Bureau of Investigation-7 nga giingong nalambigit sa abortion.
Si Senior Assistant City Prosecutor Rogelio Del Prado Jr. sa Cebu City Prosecutor’s Office nagkanayon nga adunay nakitang probable cause aron mapasaka ang kaso ngadto sa korte batok nila ni Joey Paulino Guirigay, Francisca Rebamonte, Gloria Dalogdog Gabutin ug Meryteissie Rural.
Ang NBI-7 una kining nipahigayon og managlaing entrapment operation sa dakbayan sa Sugbo ug sa Talisay niadtong Abril 29, 2021 human nga ang maong mga suspetsado nitanyag og abortion service diha sa online.
Ang grupo giingong nitanyag sa maong serbisyo pinaagi sa usa ka facebook page nga gidumala ni Guirigay kinsa usa ka computer programmer gikan sa Bohol.
Ang gitanyag nga serbisyo P30, 000 ang bayad alang sa “suction abortion” nga giingong himuon sa lisensiyado nga OB Gyne sa usa ka private clinic.
Ang NBI-7 nipahigayong og operasyon human kini nakakuha og mga impormasyon diin usa ka personnel sa ahensiya nagpakaarong-ingnon nga mokuha sa ilang serbisyo ug nakigkita kang Rebamonte.
Ang entrapment operation nahitabo diha sa Barangay Mohon, Dakbayan sa Talisay ug Barangay Labangon, Siyudad sa Sugbo.
Si Talisay City Prosecutor Marshal Rubia nipaubos sa kaso sa regular preliminary investigation ug nimando sa NBI-7 nga mosumiter og dugang nga ebidensiya ug mga dokumento nga kinahanglan pag-establisar sa probable cause sa krimen. BDB (BANATNEWS)
- Latest