400 ka molupyo nakadawat og tabang gikan sa PRC

CEBU, Philippines — Nakadawat og P3, 500   nga hinabang nga pagkaon ug salapi ang 400 ka mga molopyo   sa Ibabao Estancia nga gihatag sa Philippine Red Cross (PRC).

Ang pag-apod apod sa hinabang didto gipahigayon sa multi-purpose gym sa Barangay Ibabao Estancia sa Dakbayan sa Mandaue niadtong Lunes.                               

Si Atty Maria Vera De Jesus, PRC -Cebu Chapter Administrator, miingon nga ang mga beneficiary mao kadtong mga kabus nga wala gayod makadawat og bisan unsa nga tabang pinansyal gikan sa kagamhanan.

Suma pa ni De Jesus nga kini pinaagi usab sa pag-abag sa American Red Cross nga tuyo usab nga makatabang sa mga pamilya nga naapektohan sa coronavirus disease ilabi na dihang gipatuman ang  enhance community quarantine.

Ang pagpanghatag sa food and financial assistance nagsugod niadto pang miaging tuig sa nagkadaiyang dapit sa nasud nga matapos usab karong buwan sa Mayo ning tuiga.

Gitataw ni Atty. De Jesus nga ang gihatagan sa maong hinabang mao lamang gayod kadtong mga lugar nga grabeng naapektohan sa pandemiya.                            

Lakip sa mga dapit nga nahatagan sa maong tabang mao ang Dakbayan sa Mandaue, Dakbayan sa Naga, Talisay ug Dakbayan sa Sugbo.

Sa Dakbayan sa Mandaue mokabat sa 3,000 ang nakabenepisyo, ug lakip sa nahatagan kadtong mga sakop sa pamilya nga nataptan sa COVID-19 nga nakadawat og P3, 500 ingon man 25 ka kilos nga bugas.                          

Ikaduhang makadawat sa maong hinabang kadtong mga nawad-an og trabaho panahon sa pagpatuman sa ECQ.                           

Lakip usab sa beneficiary mao kadtong mga volunteers nga mitabang sa PRC sa pag-ila sa mga molopyo nga angay tabangan pinaagi sa maong programa. —MEL (BANATNEWS)