Gullas makigtagbo sa DPWH ug TELCO tungod sa giguba nga karsada

CEBU, Philippines — Pakigtagbuan ni Talisay City Mayor Gerald Anthony “Sam Sam” Gullas Jr ang taga Department of Public Works and Highways (DPWH) ug mga representante sa mga tele- communications company TELCO aron tukion ang suliran sa karsada.

Kini human makadawat og daghang reklamo ang dakbayan kabahin sa mga karsada nga gipanglungagan nga nakamugna na og kahasol sa mga motorista.

Gani sa post sa usa ka netizen diha sa social media adunay siklesta ang nadusmo sa lungag nga dalan.

Gumikan niini gipatawag usab ni Mayor Gullas ang taga City of Talisay-Traffic Operation Development Authority (CT-TODA), Association of Barangay Council (ABC), Engineering, Licensing ug ang taga City Planning Office aron hisgutan ang reklamo.

Nahibaw-an nila nga ang naglungag sa mga karsada mao ang mga kompaniya sa telco para sa ilang mga koneksyon.

Matud pa ni Gullas nga walay koordinasyon kanila ang mga kompaniya sa telco.

“Usahay kadlawn buhaton, human dili humanon, human ang reklamo sa tawo, ari bya sa city kay agian bya inig buntag,” suma pa sa mayor.

Sa barangay Bulacao, gitabonan man gani nila og balik ang ilang gilungag apan naapil sab nila og sira ang kanal nga lutsanan sa tubig nga maoy hinungdan sa pagbaha.

Giklaro ni Gullas ang ka importante sa pagpahibawo kanila sa unsa man nga proyekto nga pagahimoon ilabi na nga makaapekto sa publiko.

Suma pa sa mayor nga pabor siya nga pakusgan ang signal sa mga koneksyon sa internet apan gihangyo lang niya ang koordinasyon ngadto sa ilang buhatan. MEL (BANATNEWS)