Bawal gihapon mag-inom sa publikong mga lugar
Cebu, Philippines — Gipirmahan na kagahapon ni Cebu City Mayor Edgardo Labella ang Executive Order No. 130 nga naglibkas sa liquor ban sa siyudad apan gipahibalo usab niini nga kinahanglan nga mokuha og special permit ang mga kan-anan ug bars aron maka-serve og ilimnong makahubog Ang maong special permit maisyu sa higayon mga mahuman na og inspeksyon ang ilang establisamento diin sutaon ang kapasidad ingon man usab ang pagpatuman sa health protocols.
Kinahanglang magbutang sila og paskin kun pila ray masulod sa ilang establisamento aron masayod ang mga tawo ug masayon para sa mga mag-inspeksyon.
Gipahibaw usab ni Atty. Jared Limquiaco, ang head sa Business Permit and Licensing Office (BPLO) nga sa niabot na og 39 ka bars ang nakapasar sa ilang inspeksyon .
Kinahanglan nga matag establisamento, dunay Health Infection and Prevention Officer( HIPCO) nga ipaubos og training ug seminar sa Emergency Operations Center (EOC)-Cebu City nga gidumala ni Konsehal Joel Garganera.
Giklaro sa mayor nga ginadili ang pag-inom og ilimnong makahubog sa mga pampublikong lugar ug sa mga establisamento nga walay special permit gikan sa EOC.
Dili pud mahimo nga i-serve ang ilimnong makahubog atol sa curfew hours. Kinahanglan sab dunay clearance ang mga live entertainment.
Katunga o 50% lang usab sa maximum capacity ang mamahimong makasulod sa establisamento.
Moabag usab sa EOC ug BPLO sa pagpatuman sa maong kamandoan mao ang Cebu City Police Office (CCPO), Armed Forces of the Philippines (AFP) ug Prevention, Restoration, Order, Beautification and Enhancement (PROBE) team ug opisyales sa barangay.
Si Labella mibahad nga kuhaan gyud og business permit ang mga establisamento nga dili gyud morespeto sa ilang mga warning. (BANAT NEWS)
- Latest
