Siyete mil ka seniors ang nagpabakuna

Cebu, Philippines — Samtang nagpadayon ang pagpamakuna sa mga senior citizens sa siyudad sa Sugbo, wala pay plano ang siyudad nga mopagawas og pundo aron pagpalit og mga bakuna tungod kay aduna pay mangabot nga mga bakuna gikan sa nasudnong kagamhanan.

Si Dr. Jeffrey Ibones, pangulo sa Cebu City Health Department miasoy moabot na sa kapin 7,000 ka mga senior citizens ang nabakunahan ning pagsulat sa balita.

Niadtong Mayo 3, 2021 adlaw’ng Lunes subling nibalik ang siyudad sa pagpamakuna human makadawat og 9,000 doses sa Sinovac vaccines gikan sa Department of Health Central Visayas.

Matud niya moabot sa 2,000 pa ka mga senior citizens ang mabakunahan kada adlaw sa tulo ka vaccination sites sa siyudad ug base sa iyang tan-aw dili maabtan og adlaw nga Miyerkules sunod semana mahurot na sab kini.

Kun mahurot na ang maong bakuna maghuwat lang gihapon sila sa DOH kun dunay ihatag nga dugang COVID-19 vaccines.

Ang siyudad dunay gigahin nga P400 milyones sa miaging tuig aron ipalit og bakuna kontra COVID-19.

Apan si Mayor Edgardo Labella mipasabot nga samtang duna pay libreng COVID-19 vaccine gikan sa nasudnong kagamhanan dili una mogasto ang siyudad para niini.

“Sama sa akong giingon samtang duna pay gisaad ang Manila nga ihatag nato nga libre … samtang gisigehan pa ‘ta og saad nga tagaan ta nila dili sa nato gamiton ang atong kwarta,” pasabot ni Labella.

Ang mayor misalign sa gisaad kaniya ni vaccine czar Secretary Carlito Galvez Jr. nga usa sa prayoridad ang Cebu City nga hatagan og igong supply sa COVID-19 vaccine.

Sa pikas bahin, gidayeg ni Presidente Rodrigo Durerte ang Office of the Presidential Assistant for the Visayas ug Department of Health Central Visayas sa pag-established sa Visayas Covid-19 Vaccination Operations Center sa Mandaue City

“I am certain that through the dedicated efforts of the men and women of the VCVO, we can ensure the efficient delivery, storage and distribution of the vaccines to various local government units in the Visayas,” tipik sa mensahe sa pangulo.

Ang presidente nagtuo nga mamahimo kinig manual sa tanan alang sa hamugaway nga pagpamakuna nga angay sundon sa ubang LGUs subay sa National Vaccination Plan.

Base sa datos nga gipagawas sa Department of Health Central Visayas niadtong Mayo 5, 2021, adlaw’ng Miyerkules ang Cebu City nakatala og 29 ka bag-ong kaso sa Covid-19 samtang 44 ang dugang nangaayo ug usa ang nakalas.

Ang Mandaue City nakatala og 14 ka bag-ong kaso ug 27 ang dugang nangaayo.

Samtang ang Lapu-Lapu City nakatala og 12 ka bag-ong kaso ug duha ang nadugang sa mga nangaayo.— Rowena Capistrano(BANAT NEWS)