Dugang karsada gikatakdang buksan sa Dakbayan sa Sugbo

Cebu, Philippines — Gipahibalo ni Cebu City Councilor Jerry Guardo nga adunay dugang road opening nga sugdan sulod karong tuiga sa Barangay Sambag 1 ug Sambag 2 nga magkonektar sa dalan B. Rodriguez ngadto sa dalan P. Del Rosario Extension.

Matud ni Guardo nga nihatag na usab og pagtugot si Mayor Edgardo Labella alang sa maong plano.

Ang maong karsada giingong aduna kini gitas-on nga kapin sa usa ka kilometro ug duha ka lanes.

Giingong ang maong karsada nga buksan makatabang kini nga makuhaan ang problema sa trapiko sa siyudad.

Si Guardo gikatakdang mo umol usab og rekomendasyon sa posibleng pagpatukod og medium rise building diin anha ipahimutang ang mga maapektohan sa road clearing.

Gibutyag ni Guardo nga nihimo na siya og inisyal nga mga site inspection sa niaging adlaw kauban sila si Kapitan Ailien Guardo  sa Barangay Sambag 1 ug  Kapitan Ryan Aznar sa Barangay Sambag 2, pipila ka mga representante sa Department of Engineering and Public Works  (DEPW), geodetic engineers, city assessor ug Division on the Welfare of the Urban Poor ( DWUP) .

Si Guardo nagkanayon nga positibo usab ang gihimo niya nga negosasyon tali sa usa sa mga tag-iya sa lote nga maigo sa proyekto nga mao ang pamilyang Chuachoy.

Nasayran nga pipila ka bahin sa luna nga maapektohan gipanag-iya sa pamilyang Rallos.

Dugang ni Guardo nga nagpadayon gihapon karon ang ilang planning stage ug usa na niini ang pag-review sa project design diin taud-taod na nga gisugyot ang maong proyekto. (BANAT NEWS)