P1.2 milyong shabu, duha ‘dakpan sa drugbust

Cebu, Philippines — Usa ka 35-anyos nga construction worker ang nasikop sa mga sakop sa City Intelligence Unit sa Dakbayan sa Lapulapu ug Philippine Drug Enforcement Agency kon PDEA 7 sa may Barangay Pusok, Dakbayan sa Lapu-Lapu niadtong adlaw nga Martes.

Ang nasikop mao si Ronnie Dadula, nagpuyo sa Barangay Labangon ning Dakbayan sa Sugbo. Ang grupo ni Police Major Joey Bicoy maoy misikop ni Dadula base sa nakuha nilang mga impormasyon nga nagbaligya kini og ilegal nga drugas.

Nasakmit gikan ni Dadula ang 200 gramos nga gidudahang shabu nga mobalor og P1.3 milyon base sa Dangerous Drug Board Value ug buy bust money nga gigamit sa operasyon.

Samtang usa ka 24-anyos nga babaye sab ang nadakpan sa buwag nga buybust operation sa mga sakop sa Station Drug Enforcement Unit sa Pardo Police Station kagahapong adlawa diha sa Sitio Lower Lomboy, Brgy. Inayawan, Cebu City.  Ang nadakpan mao si Jemalyn Castro alyas “Lalat” kinsa nakuhaan og 25.20 gramos nga gidudahang shabu nga mokantidad og P171, 360.

Ang mga dinakpan magatubang og kasong paglapas sa RA 9165. (BANAT NEWS)